Тошкент метрополитенида 23 февралдан бошлаб она ва бола хонаси ҳамда ҳожатхона фойдаланишга топширилиши тўғрисида хабар берилганди. Бугун, 23 февраль куни Тошкент метрополитенининг «Чилонзор» бекатида она ва бола хонаси ҳамда ҳожатхона фойдаланишга топширилди. Бу ҳақда «Дарё» мухбири хабар бермоқда.
«Underground сервис» МЧЖ ходими Танзила Юсупованинг сўзларига кўра, ҳожатхона ҳамда она ва бола хонасидан фойдаланиш нархи 1 500 сўмни ташкил қилади.
Унинг таъкидлашича, ҳожатхона синов тариқасида қурилган бўлиб, келгусида гавжум, йўловчилар оқими кўп бўлган «Пахтакор», «Буюк ипак йўли» ва бошқа бекатларда қурилиши режалаштирилган.
Шунингдек, Иккинчи жаҳон уруши қатнашчилари, ногиронлиги мавжуд фуқаролар, Чернобил фалокати иштирокчилари, Ҳуқуқни муҳофаза қилувчи орган ходимлари ва Ёшлар Иттифоқи етакчилари ҳамда 7 ёшгача бўлган болалар метрополитен ҳожатхонасидан бепул фойдаланиши мумкин.
Эслатиб ўтамиз, «Дарё»да Тошкент метрополитенида содир бўлаётган носозликлар, кўрсатилаётган хизматлар сифати, қулайлик ва камчиликлар тўғрисидаги «Кассаларда навбат, тиббий ёрдам ололмайсан, бекатларни номи эмас, ўриндиқларига қараб ажратасан. Тошкент метросига нималар етишмаяпти?» сарлавҳали мақола эълон қилинганди. Тошкент метрополитени мақолага муносабат билдирган. Унда «Чилонзор» метро бекатида тажриба тариқасида ҳожатхона қуриш ишлари олиб борилаётгани, агарда бу ўзини оқласа, бошқа бекатларда ҳам амалда татбиқ этилиши айтилганди.
Изоҳ (0)