Ижтимоий тармоқларда автомобиль йўли ёқасида ўзаро жанжаллашган аёллардан бири Spark автомобилига ўтириб, бошқа бир аёлни босиб кетгани тасвирланган видео тарқалди. Бухоро вилояти Ички ишлар бошқармаси мазкур ҳолатга оид қўшимча маълумотлар билан бўлишди.
Маълум қилинишича, видеолавҳа Бухоро вилояти Ички ишлар бошқармаси масъул ходимлари томонидан ўрганилган ва ушбу ҳолат 21 февраль куни соат 13:50 да Бухоро вилоятининг Қоракўл тумани «Хўжалар» маҳалласида жойлашган Пойкент савдо мажмуаси олдида содир бўлгани аниқланган.
«Ш. исмли аёл бошқарувида бўлган Spark автомашинаси билан С.К. исмли аёлни уриб юбориб, унга тан жароҳати етказган. Ҳолат тегишли тартибда туман Ички ишлар бўлими навбатчилик қисмида қайд этилиб, терговга қадар текширув ҳаракатлари олиб борилмоқда», — дейилади хабарда.
Таъкидланишича, терговга қадар текширув ҳаракатлари вилоят Ички ишлар бошқармаси ва туман прокуратураси томонидан назоратга олинган.
Аввалроқ Тошкентда ҳайдовчи аёл маст ҳолда деб гумон қилгани учун машина бошқаришга йўл қўймаган ЙПХ ходимини ҳақоратлагани тўғрисида хабар берилганди.
Изоҳ (0)