Президент Шавкат Мирзиёев Қорақалпоғистоннинг Мўйноқ туманида фаоллар билан учрашгани тўғрисида хабар берилганди. Туман фаоллари билан суҳбат давомида «Ҳаким ота» овулидан ташриф буюрган мактабгача таълим соҳаси вакили Бахтигул Китайбекова боғчаларга болаларни 2 ёшдан қабул қилиш масаласида давлат раҳбарига мурожаат қилди, деб хабар бермоқда «Дарё» мухбири.
Китайбекова Мўйноқдан 70 километр наридаги овулда яшашини айтган. Унинг сўзларига кўра, овулда икки қаватли боғча қурилган. Таъкидланишича, боғча «Адолат» деб номланган. Президент буни эшитиб самимий кулган.
«Боғчамиздаги шароит Тошкент шаҳрида ҳам йўқ бўлса керак, деб ўйлаб қоламан. Сиздан бир илтимос, ҳеч бўлмаса олис ҳудудлар учун болаларни боғчага 3 ёшдан эмас, 2 ёшдан олишга рухсат берсангиз», – деган Бахтигул Китайбекова.
Давлат раҳбари ўзи ҳам шуни режа қилганини айтди.
«Қорақалпоғистонда биринчи босқичда мактабларда бошланғич синф ўқувчиларига бепул овқат беришни жорий этдик. Бу жуда маъқул иш бўлди, дейиш мумкин. Боғчаларга болаларни 2 ёшдан қабул қилиш бўйича менинг ҳам ниятим бор. Аммо ҳали озроқ вақт бор. Иқтисодиётимизни салгина мустаҳкамлаб олайлик, кейин бу ишни амалга оширамиз. Агар ҳозир фақат Қорақалпоғистон учун буни йўлга қўйсак, бошқа ҳудудларга нисбатан тўғри бўлмайди», — дейди президент.
Маълумот учун, Вазирлар Маҳкамасининг 2017 йил 19 июлдаги қарори билан боғчаларга қабул ёши 3 ёш этиб белгиланган.
Изоҳ (0)