Тожикистоннинг Хўжанд шаҳридан Фарғона вилоятининг Қўқон шаҳрига автобус қатнови йўлга қўйилди, дея хабар берди «Дарё» мухбири.
Хўжанддан йўлга чиққан йўловчилар «Андархон» чегара масканида кутиб олиниб, Қўқон шаҳрига кузатиб қўйилган. Бешариқ тумани ҳокими Расулжон Жўраев божхона масканида Тожикистондан келаётган йўловчиларни кутиб олиб, уларга оқ йўл тилаган.
Янги халқаро йўналишда иш бошлаган автобус қатнови эрталаб соат 08:00 да Хўжанд шаҳридан Қўқонга йўл олади.
Автобус қатнови кечки соат 20:00 да Хўжанд шаҳрига охирги йўналишни бажаради. Йўлкира ҳақи Хўжанддан Қўқонгача 100 минг сўмни ташкил этади. «Йўловчиларнинг талаб ва истакларига кўра автобус қатнови кўпайтирилиши мумкин», — дейилади хабарда.
Эслатиб ўтамиз, 2021 йилнинг октябрида Хўжанд шаҳрининг 16-микрораёнида жойлашган автобус бекатидан Тошкентдаги Собир Раҳимов номидаги автовокзалгача бўлган йўналишда автобуслар қатнови йўлга қўйилган эди.
Изоҳ (0)