«Уйига олиб кетишса ҳам майли». Шавкат Мирзиёев мактабларда бошланғич синф ўқувчиларига бепул овқат берилиши ҳақида гапирди

Шавкат Мирзиёев Мўйноқ фаоллари билан учрашувда мактаб ўқувчиларига бепул овқатлар берилиши тўғрисида сўради, деб хабар бермоқда «Дарё» мухбири.

Давлат раҳбари масъуллардан Қорақалпоғистонда мактаб ўқувчиларига бепул овқатлар берилаяптими деб сўради. Қорақалпоғистон Республикаси Вазирлар Кенгаши раиси Қаҳрамон Сариев ўқувчилар учун овқатлар берилаётганини тасдиқлаган.

Унинг сўзларига кўра, айни вақтда 142 минг нафар болалар бепул овқат билан таъминланмоқда. «Ҳатто баъзилари уйларига ҳам олиб кетяпти», — дейди у.

«Уйига олиб кетишса ҳам майли. Еса, кучли бўлса, соғлиғи тикланса бўлди. Насиб қилса, пулимиз кўпайгандан кейин уйларига ҳам қилиб берамиз. Бу ҳам ‘Қорақалпоғистон тажрибаси’ бўлди. Буни энди бошқа вилоятларда йўлга қўямиз. Ҳали юқори синф ўқувчиларига ҳам бу нарсани жорий этамиз», — деган Шавкат Мирзиёев.

Эслатиб ўтамиз, Қорақалпоғистон ва Хоразм вилоятида 2022 йил 1 апрелидан бошлаб мактаблардаги 1—4-синф ўқувчиларини бепул овқат билан таъминлаш тизими жорий этилади.

Аввалроқ Шавкат Мирзиёев Тошкентдан Қорақалпоғистонга келиб ишлайдиган тиббиёт ходимларининг маошига 100 фоиз устама ҳақи тўланишини айтганди. Президент мазкур йўналишда қарор ишлаб чиқиш бўйича топшириқ берган. Тошкент вилояти мазкур йўналишда 32 миллиард сўм ажратиши маълум қилинган.