Ижтимоий тармоқларда Тошкент шаҳридаги Сергели автомобиль бозорида «Рио-2016» совриндорига Ўзбекистон президенти совға қилган Malibu сотилаётгани акс этган видео тарқалди.
Тасвирда айтилишича, бундай позициядаги Malibu’лар Ўзбекистонда 33 дона ишлаб чиқарилган.
«Президент бу машинани 2016 йилда Рио де-Жанейрода ўтказилган паралимпия ўйинлари совриндорига совға қилган. Автомобиль 57 минг километр юрган. Malibu қора рангда. Унга қўшимча жиҳозлар ҳам ўрнатилган. Нархи 19 минг доллар», — деган машинани шарҳлаган киши.
Машина айнан қайси спортчига тегишли эканлигига аниқлик киритиш мақсадида «Дарё» мухбири видеотасвирда айтилган телефон рақам билан боғланди. Қўнғироққа жавоб берган шахснинг айтишича, Malibu унга тегишли эмас.
«Мен сотувчиман. Malibu 19 минг долларга сотилди», — деди у.
Эслатиб ўтамиз, 2016 йилда Бразилиянинг Рио де-Жанейро шаҳрида бўлиб ўтган XV ёзги Паралимпия ўйинларида 5 та спорт тури бўйича 32 нафар спортчи Ўзбекистон терма жамоаси шарафини ҳимоя қилиб, 8 та олтин, 6 та кумуш, 17 та бронза — жами 31 та медални қўлга киритган ва медаллар рейтингида 16-ўринни эгаллаганди.
Ўзбекистон президенти қарори билан олтин медал олган спортчиларнинг ҳар бири 200 минг доллардан, кумуш медал соҳиблари 100 минг доллардан, бронза медални қўлга киритганлар 75 минг доллардан пул мукофоти ва Malibu автомобили билан тақдирланган. Шунингдек, делегация таркибидаги спортчилар Ўзбекистон Миллий олимпия қўмитаси ҳузуридаги Олимпиячиларни қўллаб-қувватлаш жамғармаси томонидан сотиб олинган Malibu автомобиллари билан мукофотланган.
Изоҳ (0)