Ҳуқуқни муҳофаза қилувчи идоралар томонидан ҳамкорликда ўтказилган тезкор тадбирлар давомида Тошкент шаҳри ва Тошкент вилояти ҳудудида экстремистик ташкилотларнинг ноқонуний равишда фаолият юритган бир гуруҳ аъзолари аниқланди. Бу ҳақда пойтахт ИИББ матбуот хизмати хабар берди.
Тадбир давомида ушланган шахсларнинг яшаш манзилларида ўтказилган тергов ҳаракатлари натижасида, экстремистик оқим ва халқаро террорчилик ташкилоти тарғиботчиларининг ақидапарастлик ғоялари билан йўғрилган ҳамда тақиқланган материаллари топилиб, қонуний тартибда расмийлаштирилиб олинган.
Ўтказилган тадбирлар натижасида экстремистик ташкилотларга алоқадор 24 нафар шахс ушланиб, уларга нисбатан тергов давом этмоқда.
«Фуқароларимиз, айниқса ёшларимизни огоҳлантириб, бу каби қонун бузилишларига йўл қўймаслик мақсадида бузғунчи ғоялар таъсирига тушиб, ижтимоий тармоқларнинг шубҳали сайтларидаги даъватларига алданиб қолмасликларини, жамоат тартибига таҳдид солувчи материаллардан фойдаланмасликларини, уларни сақламасликларини ва тарқатмасликларини сўраб қоламиз», — дейилади хабарда.
Аввалроқ Сирдарёда Telegram орқали экстремистик материалларни тарқатиш билан шуғулланган шахс ушлангани, Қўқонда «Ҳизб ут-Таҳрир»га аъзолиги учун икки марта қамалиб чиққан киши яна шу жинояти учун қўлга тушгани, Фарғонада «Туркистон ислом ҳаракати» террористик ташкилоти ғояларини тарғиб қилган эркак ушлангани тўғрисида хабар берилганди.
Изоҳ (0)