Бухоро вилояти Жондор туманида маҳалла фуқаролар йиғини раиси 400 минг сўм билан фуқарони «темир дафтар»га киритиб қўймоқчи бўлди. Бу ҳақда ЎзА хабар қилди.
Қайд этилишича, Бош прокуратура ҳузуридаги департаментнинг Бухоро вилояти бошқармаси, вилоят ИИБ ҳамда Миллий гвардия Бухоро вилояти бўйича бошқармаси масъуллари ҳамкорлигида тадбир ўтказилган. Унда Жондор туманидаги маҳаллаларнинг бирида раис лавозимида ишловчи фуқаро А.А. (1977 йилда туғилган) эгаллаб турган хизмат мавқейидан фойдаланиб, фуқаро Н.Ш.ни алдаб, унинг ишончини суиистеъмол қилган.
У ваколатли танишлари орқали уни «темир дафтар» га рўйхатга киритиш эвазига 400 минг сўм пора сўраган. У 14 февраль куни соат тахминан 16:35 ларда Жондор туманидаги ўзи раислик қилувчи маҳалла биносида фуқаро Н.Ш.дан кимёвий ишлов берилган 400 минг сўм пулни олган вақтида ашёвий далиллар билан ушланган.
Ҳолат юзасидан фуқаро А.А.га Жиноят кодексининг 168-моддаси (фирибгарлик) 3-қисми билан жиноят иши қўзғатилиб, 28, 211-модда (пора бериш) 1-қисми билан қўшимча айб эълон қилинган.
Изоҳ (0)