Ўзбекистон йўлларида сўнгги кунларда содир бўлган йўл-транспорт ҳодисалари тафсилотларини тақдим этамиз.
Жиззахда тўқнашув оқибатида икки нафар йўловчи ҳалок бўлди
Қайд этилишича, ЙТҲ 15 февраль куни 00:10 ларда Жиззах вилояти Шароф Рашидов тумани «Халқобод» маҳалласи ҳудудидан ўтган Тошкент—Термиз М-39 йўлида юз берган. «Хайробод» маҳалласида ҳайдовчи (1999 йилда туғилган) Nexia машинасини бошқариб бораётиб, ўзидан олдинда ҳаракатланиб келаётган Volvo автомобилини қувиб ўтаётган вақтида, олд чап томонига тегиб, бошқарувни йўқотган ва йўлни ажратиб турувчи бетон тўсиққа урилган.
Оқибатда Nexia салонидаги бир нафар эркак ва аёл воқеа жойида вафот этган. Ҳайдовчи ва яна бир йўловчи, шунингдек, уч нафар вояга етмаган бола эса турли тан жароҳатлари олиб, республика шошилинч тиббий ёрдам илмий маркази вилоят филиали жонлантириш бўлимига ётқизилган.
Ҳолат юзасидан жиноят иши қўзғатилган.
Тошкентда тўқнашув сабаб иккита машина ағанади
Тошкент шаҳар Шайхонтоҳур туманида 19 февраль куни учта машина иштирокида йўл-транспорт ҳодисаси содир бўлди. Шу куни куни соат 22:40 ларда Себзор кўчасидаги кўприк устида ҳайдовчилар:
- С.Ж. (1998 йилда туғилган) бошқарувидаги Matiz;
- К.Қ. (2001 йилда туғилган) бошқарувидаги Spark;
- Д.А. (2001 йилда туғилган) бошқарувидаги Lada Vesta транспорт воситалари иштирокида тўқнашув содир бўлган.
ЙТҲда Spark ичидаги икки нафар йўловчи тан жароҳати олиб, шифохонага етказилган.
Айни вақтда ЙПХ ходимлари томонидан ҳодиса жойида ҳайдовчилар иштирокида тегишли ҳужжатлар расмийлаштирилиб, суриштирув ҳаракатлари олиб борилмоқда.
Изоҳ (0)