Ижтимоий тармоқларда Тошкент вилояти Қибрай туманидаги «Ёзувчилар ижод уйи» ёнида юзлаб дарахлар кесилгани ҳақида хабар тарқалди. Вилоят Экология ва атроф-муҳитни муҳофаза қилиш бошқармаси ҳолатга муносабат билдирди.
Қайд этилишича, ушбу боғ тадбиркорлик субъектига тегишли мулк ҳисобланади. «Ўсимлик дунёсини муҳофаза қилиш ва ундан фойдаланиш тўғрисида»ги қонуннинг 45-моддасида «Ёғоч олиш ва мевалар етиштириш учун махсус экилган, юридик ёки жисмоний шахснинг мулки бўлган дарахтлар ва буталарни (тераклар ва бошқа тез ўсадиган турлар, тутзорлар, мевали дарахтлар ва буталар) кесиш учун рухсатнома талаб қилинмайди деб белгиланган.
Шунингдек, «Давлат ўрмон фондига кирмайдиган ерларда дарахтлар ва буталардан фойдаланишни тартибга солиш ва улардан фойдаланиш соҳасида рухсат бериш тартибини янада такомиллаштириш тўғрисида»ги қарорда «Юридик ёки жисмоний шахсларнинг мулки бўлган ва улар томонидан ёғоч-тахта ва ҳосил олиш учун экилган дарахтлар ва буталарни, шу жумладан, ипак қуртини боқиш мақсадида тут дарахти шохларини кесишга» Давлат экология қўмитаси органларининг хулосаси талаб этилмайди деб белгиланган.
Шунга мувофиқ, юқоридаги объектга тегишли бўлган боғдаги мевали дарахтларни самара бермагани учун кесиш ва ўрнига бошқа турдаги дарахтларни экишга Давлат экология органларининг хулосаси талаб этилмайди.
Хабарга илова қилинган ҳужжатда айтилишича, 17,9 гектар ер майдонидаги боғда мевали дарахтлар экилган бўлиб, 4 йил давомида баҳор ойида сурункали совуқ ургани сабаб дарахтларнинг ҳосил шохлари ёрилиб, қуриб кетган. Шу сабаб дарахтларни кесишга рухсат берилган.
Аввалроқ Андижонда 12 туп дарахт ноқонуний кесилгани юзасидан жиноят иши қўзғатилгани, Ўзбекистонда дарахт кесишга мораторий муддатсиз даврга узайтирилиши, Юнусободда қурилиш режалаштирилган ҳудуддаги 10 та қарағай арралаб кетилгани бўйича жиноят иши қўзғатилгани тўғрисида хабар берилганди.
Изоҳ (0)