19 февраль куни Тошкент—Истанбул йўналишида парвозни амалга оширган Uzbekistan Airways самолёти Россия ҳарбий ҳаво кучлари ҳарбий машғулотлар олиб бораётган, фуқаро авиацияси учун ёпилган Қора денгиз акваторияси ҳаво ҳудудидан ёлғиз ўзи учиб ўтгани ҳақида flightradar24.com сайти маълумотларига таянилган хабарлар тарқалганди. «Дарё» ушбу хабарларга аниқлик киритиш мақсадида Uzbekistan Airways бошқаруви раисининг биринчи ўринбосари Умид Ҳусановдан изоҳ олди.
Унинг маълум қилишича, HY-271 рейси 19 февраль куни Тошкент—Истанбул йўналиши бўйича мунтазам авиақатновни амалга оширган пайтда парвозларни чекловчи аэронавигация маълумотлари бўлмаган.
«Ушбу парвоз Ўзбекистон, Қозоғистон, Каспий денгизи, Россия, Шимолий Кавказ, Қора денгиз ва Туркия ҳаво ҳудудлари бўйлаб амалга оширилган. Шуни алоҳида таъкидлаш жоизки, Uzbekistan Airways экипажи томонидан бундай қарор қабул қилинган пайтда ушбу йўналишдаги парвозларни чекловчи аэронавигация маълумотлари мавжуд эмас эди. Қора денгиз устидан ҳаво кемалари ҳаракати хавфсизлиги Россия ҳаво ҳаракатини назорат қилиш органлари (Ростов ҳаво ҳаракатини назорат қилиш маркази) ва Туркия (Анқара парвоз маълумоти ҳудуди) томонидан узлуксиз таъминланган. Рўйхат рақами UK75701 бўлган Boeing 757 ҳаво кемаси экипажи Ростов ҳаво ҳаракатини назорат қилиш марказининг диспетчери билан алоқага чиқиб, Қора денгиз ҳаво ҳудудидан фойдаланиш учун рухсат олган ҳамда парвозни шу йўналиш бўйича давом эттирган», — дейди Умид Ҳусанов.
У, шунингдек, 19 февраль куни Uzbekistan Airways авиакомпанияси ҳаво кемасидан ташқари Россия, Туркия, Озарбайжон, Ироқ ва бошқа давлатларга тегишли авиакомпанияларнинг самолётлари ҳам юқорида кўрсатилган ҳудудда парвозни амалга оширганини ҳам қўшимча қилган.
Умид Ҳусановнинг таъкидлашича, авиакомпания ҳар бир авиақатновнинг парвоз йўналишини белгиланган хавфсизлик талаблари асосида, барча давлатларнинг ҳаво майдонидаги вазиятни батафсил таҳлил қилиш орқали танлайди. Агар маълум бир чекловлар мавжуд бўлса, авиакомпания экипажи ушбу ҳудудни четлаб ўтиш учун муқобил йўналишларни таҳлил қилиб чиқади ва якуний қарор қабул қилади.
«Uzbekistan Airways авиакомпанияси фаолиятида асосий мезон бу — йўловчи ва парвозлар хавфсизлигини таъминлаш бўлиб қолади. Шуни таъкидлаш жоизки, HY-271 авиарейсида парвоз қилган 155 нафар йўловчининг ҳаётига ҳеч қандай хавф туғилмаган. Бизнинг рейсимиз белгиланган жадвал ва хавсиз хизмат кўрсатиш бўйича барча халқаро стандартлар асосида амалга оширилган.
Ўз навбатида, оммавий ахборот воситалари вакиллари ва блогерларга Ўзбекистон Республикаси фуқаролари ва йўловчилар хавфсизлигига оид тасдиқланмаган ахборотларни тарқатганлик учун қонунчиликда жавобгарлик белгиланганини эслатиб ўтмоқчиман», — дея сўзларини якунлаган Uzbekistan Airways бошқаруви раисининг биринчи ўринбосари.
Изоҳ (0)