Наманган вилояти Учқўрғон туманидаги 13-мактабда дарс тайёрламаган 1-синф ўқувчилари доскага чиқарилиб, ўқитувчи томонидан изза қилингани, оқибатда у ишдан олингани хабар қилинганди. «Ёшлар» телеканалининг «Янги давр» информацион дастурида маълум қилинишича, ўқувчиларнинг ота-оналари синф раҳбарининг ишдан кетмаслигини сўради.
Қайд этилишича, ота-оналар ўқитувчининг ишдан олинмаслиги, фаолиятини давом эттиришини сўраб, бир қатор ижобий фазилаталарини санаб ўтган.
«Карантин пайти ўзи уйма-уй юриб ўқувчиларни ўқитиб келган пайти ҳам бўлган у аёлнинг. Болаларнинг билими пасайиб кетмаслиги учун», — деган ўқувчилардан бирининг отаси.
Ота-оналар ўқитувчи фарзандларини яхши ўқитаётганини, бундан буёғига ҳам ўзи ўқитишини, айби йўқлигини айтиб, уларни ҳеч ким чақирмаганини, ўз хоҳиши билан йиғилганини билдирган.
«Болаларимиз энди шу аёлга ўрганди, бошқасига ўргангунча қийналади», — дейди оналардан бири.
«Ўқувчиларимнинг ота-оналари билан шахсий гуруҳ очволгандик. Болаларнинг камчилиги, дарсларни бажармаётгани ҳақида улар билан муҳокама қилиб турардик. Видеони ўзим олиб, ота-оналарга юборганман. Бунда мана шу ўқувчилар хулоса чиқариб олсин, деган мақсад бор эди, ёмон ниятда қилинмаган. Бу ишимдан пушаймонман, бу ҳолат бошқа қайтарилмайди», — дея қайд этган ўқитувчи Ш.М.
Ҳолат юзасидан синф раҳбари Ш.М. билан тузилган меҳнат шартномаси бекор қилинган. Меҳнат кодексининг 181-моддаси (интизомий жазолар) 1-бандига кўра, ўз вазифасига совуққонлик билан қарагани учун таълим муассасаси директори О.М., маънавий-маърифий ишлар бўйича директор ўринбосари Й.А.га ҳайфсан интизомий жазо чораси қўлланган, ўқув ишлари бўйича директор ўринбосари М.И. жиддий огоҳлантирилган.
Эслатиб ўтамиз, 8 февраль куни Андижон вилояти Марҳамат туманида ўқитувчилар мактабларда ўқувчиларнинг ўзлаштириши қониқарсиз экани туфайли ота-оналардан узр сўрагани айтилган хабар эълон қилинди. Ҳолат кенг жамоатчилик вакиллари орасида муҳокамага сабаб бўлди. Хусусан, Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов «Шуҳрат Абдураҳмоновнинг шахсан ўзи барча устозлардан узр сўраши керак»лигини ёзди.
Кейинроқ Андижон вилояти ҳокими Шуҳрат Абдураҳмонов ҳам ушбу ҳолатга муносабат билдириб, «хатога йўл қўйган ҳар қандай раҳбарга қонунда белгиланган жазо чораларини кўрилишини таъминланишини»ни таъкидлади. Андижон вилояти халқ таълими бошқармаси бошлиғи ва Марҳамат тумани ҳокими ўқитувчилардан узр сўради.
14 февраль куни узрбозлик ортидан туман ҳокими ўринбосари Мухтор Қурбонов ишдан олинди. Марҳамат туман ҳокими Бобур Йўлдошев эса ҳайфсан билан қутулиб қолди. Шунингдек, Андижондаги ўқитувчилари узр сўраган мактаб директори ва туман ХТБ мудири ҳам лавозимидан озод этилди.
Изоҳ (0)