Украина президенти Владимир Зеленский Россия президенти Владимир Путин билан «исталган формат»да учрашишга тайёр. Бу ҳақда Украина етакчиси «РБК-Украина» нашрига берган интервьюсида маълум қилди.
Зеленский «тўғридан-тўғри музокараларга икки ярим йилдан буён» тайёрлигини айтган.
Унинг сўзларига кўра, ҳар сафар «Россия деескалация тўғрисида гапиришга тайёрлигини айтганда» Киев Москвага ушбу учрашув «бирор форматда ўтказилишини» сўраб, сўров юборади. Аммо Зеленскийнинг фикрича, «аслида улар мулоқот қилишга тайёр эмас».
Россия президентининг матбуот котиби Дмитрий Песковнинг маълум қилишича, Москва бу каби таклифларни кўп марта олган, бироқ ҳар сафар Киев бундай учрашув нима сабабдан кераклиги тўғрисидаги саволга жавоб қайтармаган. Унинг таъкидлашича, Украина томони «фақат Донбасс ҳақида» гапиришни хоҳлайди. «Бошқа мавзулар бўйича бизга саволларингиз борми? Жим бўлишади», — дейди Песков.
Баёнот Украина қуролли кучлари томонидан Донбассда олиб борилаётган Қўшма кучлар операцияси ўтказилаётган зонада берилган.
Эслатиб ўтамиз, 2021 йилнинг 20 апрель куни Зеленский Путинга Украинанинг Донбассидаги уруш кетаётган исталган жойида учрашишни таклиф қилганди. Путин бунга жавобан агар Украина президенти Донбасс муаммосини муҳокама қилмоқчи бўлса, аввал у Донецк ва Луганск Халқ Республикаларининг раҳбарлари билан учрашиши кераклигини ва шундан кейингина учинчи томон сифатида Россия раҳбарияти билан учрашиши мумкинлигини айтган. Шунингдек, у Россия томонининг Украина билан икки мамлакат ўртасидаги муносабатлар ҳақида гаплашишга тайёрлигини билдирган ва Зеленскийни «ўзига қулай бўлган исталган вақтда» Москвага келишга таклиф қилган. Украина президенти декабрь охирида ҳам Путин билан учрашишга тайёрлигини билдирганди.
Изоҳ (0)