Россия Ғарбий ҳарбий округининг танк армияси бўлинмалари ва моддий-техник таъминот бригадалари машғулотлар тугагандан сўнг доимий жойлашиш пунктларига йўл олди. Бу ҳақда Россия Мудофаа вазирлигига таяниб, Meduza хабар берди.
Вазирлик кўп сонли зирҳли техникалар билан жўнаб кетаётган темир йўл эшелонининг видеотасвирларини эълон қилди. Кадрлардан ҳарбий карвоннинг кечаси қорли ҳудудда кетаётганини кўриш мумкин.
Россия Мудофаа вазирлиги баёнотида ҳарбийлар айнан қайси ҳудуддан қайтаётгани айтилмаган. Фақатгина танк ускуналари минг километрга яқин масофадан ташилаётгани таъкидланган.
«Моддий-техник таъминот бригадасининг ҳарбийлари режалаштирилган машғулотларни ўтказиш учун бўлиб турган полигондан доимий жойлашиш нуқтасигача қарийб 900 километр масофани босиб ўтди», — дейилади Мудофаа вазирлиги хабарида.
Бир кун аввал вазирлик Жанубий ҳарбий округ қўшинларининг Қримдаги машғулотлари якунлангани ҳақида ҳам хабар берганди.
Айни пайтда АҚШ Давлат департаменти матбуот котиби Нед Прайснинг айтишича, Мудофаа вазирлигининг армия машғулотлардан қайтиши ҳақидаги видеоси эълон қилинганига қарамай, Россия нафақат Украина атрофидаги вазиятни юмшатмаяпти, балки Украина билан чегарада қўшин тўплашда давом этмоқда.
Давлат департаменти ҳисоб-китобларига кўра, Москва чегараларда аллақачон 150 мингдан ортиқ аскар тўплаган, сўнгги кунларда уларнинг сони яна 7 мингга ошган.
Куздан бери Ғарб давлатлари Россия қўшинларининг Украина билан чегараларда тўпланиши ва Москванинг қўшни давлатга бостириб кириши мумкинлиги ҳақида гапирмоқда. Ҳужумнинг норасмий саналаридан бири деб 16 февраль айтилганди. Москва ўз қўшинларининг ҳаракатини машқлар билан изоҳламоқда ва ҳеч қандай ҳужум нияти йўқлигини айтмоқда. Украина билан боғлиқ кескинликлар фонида Кремль АҚШ ва НАТО билан Европада хавфсизлик кафолатлари бўйича музокаралар бошлади.
Изоҳ (0)