Туркманистонда президентликка номзодларни рўйхатга олиш давом этмоқда. 16 февраль куни Марказий сайлов комиссияси Аграр партиядан кўрсатилган Агаджан Бекмирадовнинг номзодини рўйхатга олганди. Шунингдек, туркман мухолифатининг хориждаги вакиллари ҳам президентлик сайловларида қатнашиш истагини билдирди.
Туркманистонлик таниқли отбоқар, собиқ сиёсий маҳкум Гелди Кяризов муқобил сайловлар ва электрон овоз беришни ўтказиш нияти борлигини маълум қилди. Айни пайтда у «Туркманистон фуқароларининг ҳуқуқ ва эркинликлари» инсон ҳуқуқлари ташкилотининг аъзоси.
Овоз беришни қандай тартибда ўтказиш режалаштирилгани ҳозирча номаълум. «Биз ҳозир сайловчиларимиз хавфсизлигини таъминлаш учун хавфсиз дастурни топиш устида ишлаяпмиз», — деди Кяризов ўз баёнотида.
Номзоднинг таржимаи ҳоли Туркменюрт сайтига жойланган.
«Азатлик» радиосининг хабар беришича, «Туркманистон демократик сайлови» мухолифат ҳаракати раҳбари Мурод Қурбонов ҳам сайловда иштирок этиш ниятида. У Telegram, Imo, WhatsApp мессенжерларида, шунингдек, YouTube ва Facebook ижтимоий тармоқларида муқобил овоз беришни ўтказиш режалари ҳақида гапирган.
Қурбоновнинг сўзларига кўра, бу акция Туркманистон сайловларидаги ноқонунийликларни очиб бериши керак.
Туркманистон конституциясига мувофиқ сўнгги 15 йил давомида мамлакатда доимий яшаб, фаолият юритиб келаётган фуқароларгина президентлик сайловида қатнашиши мумкин. Бу қоида муқобил мухолифат номзодларини президентлик учун ариза бериш имкониятидан маҳрум қилади. Режимнинг ўта репрессив табиати туфайли Туркманистонда мухолиф партиялар ҳам, сиёсатчилар ҳам йўқ. Ҳозирги ҳукуматнинг сиёсий мухолифлари мамлакатни тарк этишга мажбур бўлган.
Эслатиб ўтамиз, 11 февраль куни Туркманистон парламенти олий палатасининг навбатдан ташқари йиғилишида мамлакатни 15 йилдан бери бошқариб келаётган Гурбангули Бердимуҳамедов раҳбарликни ёшларга топшириш ва фаолиятини Халқ маслаҳати раиси сифатида давом эттириш ниятини маълум қилди.
15 февраль куни Бердимуҳамедовнинг ўғли, иқтисодиёт бўйича бош вазир ўринбосари Сердар Бердимуҳамедов бўлажак сайловларда мамлакат президентлигига биринчи номзод сифатида кўрсатилди.
Изоҳ (0)