Россиядаги АҚШ элчисининг ўринбосари Бартл Горман мамлакатдан чиқариб юборилди. Бу ҳақда элчихона «РИА Новости»га маълум қилди.
Элчихона бу қарор сабабларини очиқламаган. Қайд этилишича, Қўшма Штатлар ҳодисани «эскалатив қадам» деб ҳисобламоқда ва дипломатнинг чиқариб юборилишига жавоб қайтариш имкониятини кўриб чиқмоқчи.
Дипломатик миссия, шунингдек, Горман АҚШнинг Москвадаги элчихонасидаги иккинчи муҳим амалдор ва «элчихона юқори раҳбариятининг асосий аъзоси» эканини таъкидлаган.
Кейинроқ маълум бўлишича, Россия Ташқи ишлар вазирлиги Вашингтондаги Россия элчихонасининг элчи-маслаҳатчиси АҚШдан чиқариб юборилишига жавобан Бартл Горманни мамлакатдан чиқариб юборган.
АҚШ ва Россия ўртасидаги муносабатлар сўнгги ойларда Украина атрофидаги вазият туфайли ёмонлашган. Вашингтоннинг фикрича, Россия Федерацияси қўшни давлат ҳудудига бостириб кириши мумкин; Москва буни рад этмоқда ва АҚШни вазиятни атайлаб кескинлаштирганликда айбламоқда.
Мавзуга доир:
- АҚШ 24 нафар россиялик дипломатдан мамлакатни тарк этишни сўради
- Буюк Британия Россия элчисини «Россиянинг зарарли хатти-ҳаракатлари» муносабати билан ҳукуматга чақирди. Россия ҳам худди шундай жавоб қайтарди
- АҚШ Россиядаги элчисини ўзгартирмасликка қарор қилди. Аввалроқ Россия АҚШдаги элчисини чақириб олган эди
Изоҳ (0)