Бугун, 18 февраль куни бўлиб ўтган Парламент комиссиясининг навбатдаги мажлисида Олий Мажлис Сенати раиси Танзила Норбоева Тошкент шаҳрининг ифлосланиш даражаси юқорлигини таъкидлаб ўтди, дея хабар бермоқда «Дарё» мухбири.
«Тошкент шаҳри ҳавосининг ифлосланиш даражаси меъёри Жаҳон соғлиқни сақлаш ташкилоти томонидан 10 микрограмм этиб белгиланган. Мамлакатлардаги ҳавонинг сифатини ўрганувчи IQAir ташкилотининг 2020 йил таҳлилига кўра, Тошкент ҳавосининг майда дисперс заррачалари билан ифлосланиши даражаси 29,9 микрограммни ташкил этган. Ҳавонинг ифлосланиш даражаси бўйича дунёнинг 106 мамлакати орасида Ўзбекистон 18-ўринни эгаллаган. Бу ёмон натижа ҳисобланади», — деди Сенат раиси.
Танзила Норбоеванинг айтишича, ҳавонинг ифлосланиш даражасини пасайтириш учун мамлакатда велосипед ва бошқа моторсиз транспорт турларини ривожлантириш лозим.
Эслатиб ўтамиз, 2021 йилнинг ноябрь ойида Ўзбекистон ҳудудига Урал томондан совуқ ҳаво оқими кириб келган. Совуқ ҳаво фронти зонасида шамол тезлиги 12-15 метр/сонияга қадар кучайди, Бухоро, Навоий, Жиззах вилоятларида эса сониясига 20-25 метрга қадар етди. Шу куни Тошкентда чанг миқдори рухсат этилган ме‘ёрдан 5 баробарга, кейинроқ маҳаллий вақт билан соат 21:00 ва 23:00 орасида 30 баробаргача кўтарилганди ва пойтахт ҳавонинг ифлосланиш даражаси бўйича дунёда биринчи ўринга чиққан.
Изоҳ (0)