Bugun, 18-fevral kuni bo‘lib o‘tgan Parlament komissiyasining navbatdagi majlisida Oliy Majlis Senati raisi Tanzila Norboyeva Toshkent shahrining ifloslanish darajasi yuqorligini ta’kidlab o‘tdi, deya xabar bermoqda “Daryo” muxbiri.
“Toshkent shahri havosining ifloslanish darajasi me’yori Jahon sog‘liqni saqlash tashkiloti tomonidan 10 mikrogramm etib belgilangan. Mamlakatlardagi havoning sifatini o‘rganuvchi IQAir tashkilotining 2020-yil tahliliga ko‘ra, Toshkent havosining mayda dispers zarrachalari bilan ifloslanishi darajasi 29,9 mikrogrammni tashkil etgan. Havoning ifloslanish darajasi bo‘yicha dunyoning 106 mamlakati orasida O‘zbekiston 18-o‘rinni egallagan. Bu yomon natija hisoblanadi”, — dedi Senat raisi.
Tanzila Norboyevaning aytishicha, havoning ifloslanish darajasini pasaytirish uchun mamlakatda velosiped va boshqa motorsiz transport turlarini rivojlantirish lozim.
Eslatib o‘tamiz, 2021-yilning noyabr oyida O‘zbekiston hududiga Ural tomondan sovuq havo oqimi kirib kelgan. Sovuq havo fronti zonasida shamol tezligi 12-15 metr/soniyaga qadar kuchaydi, Buxoro, Navoiy, Jizzax viloyatlarida esa soniyasiga 20-25 metrga qadar yetdi. Shu kuni Toshkentda chang miqdori ruxsat etilgan me‘yordan 5 barobarga, keyinroq mahalliy vaqt bilan soat 21:00 va 23:00 orasida 30 barobargacha ko‘tarilgandi va poytaxt havoning ifloslanish darajasi bo‘yicha dunyoda birinchi o‘ringa chiqqan.
Izoh (0)