Ўзбекистонда йўловчиларнинг 72 фоизи Damas транспорт воситасидан фойдаланмоқда. Бу ҳақда 18 февраль куни бўлиб ўтган Парламент комиссиясининг навбатдаги мажлисида Олий Мажлис Сенати раиси Танзила Норбоева айтиб ўтди, дея хабар бермоқда «Дарё» мухбири.
Сенат раисининг айтишича, мамлакатда аҳолига қулай транспорт хизматини кўрсатиш ва уларни хавфсиз жамоат транспорти билан таъминлаш борасида муаммолар кўп.
«Республика бўйича ҳар минг нафар аҳоли учун ўртача 0,5 та автобус тўғри келади. Ҳудудлардаги йўналишли таксилар, яъни Damas автомобилларини тартибга солиш зарур. Бугунги кунда йўловчиларнинг 72 фоизи айнан ушбу транспорт воситасидан фойдаланишга мажбур», — деди Сенат раиси.
Таъкидланишича, йўл-транспорт ҳодисаларининг катта қисми Damas’лар иштирокида содир бўлмоқда.
«Масалан, 2021 йилда рўй берган йўл-транспорт ҳодисасининг 21 фоизидан ортиғи ушбу транспорт тури иштирокида рўй берган», — дейди Танзила Норбоева.
Аввалроқ президент Шавкат Мирзиёев 11 февраль куни ўтказилган видеоселектор йиғилишида Ўзбекистонда йўл ҳаракати хавфсизлиги масаласи издан чиқиб кетганини таъкидлаган эди. Ўзбекистонда ҳайдовчиликка ўқитиш ва гувоҳнома бериш бўйича янги тизим яратилиши, қоидабузар ҳайдовчилар учун жарима баллари тизими жорий этилиши ҳақида хабар берилганди.
Маълумот учун, Ўзбекистонда 2021 йилда йўл-транспорт ҳодисалари оқибатида жами 2426 киши ҳалок бўлдиган. 2021 йилнинг январь—декабрь ойларида жами 10 001 та йўл-транспорт ҳодисалар содир этилган бўлиб, улар оқибатида 9230 киши жароҳат олган.
ЙТҲларнинг 4698 таси пиёдалар, 1621 таси болалар, 1075 таси велосипедчилар, 84 таси мотоциклчилар билан содир бўлган. Авариялар содир этган ҳайдовчиларнинг 268 нафари аёллар бўлса, 9733 нафари — эркаклар.
Изоҳ (0)