Польша Россия билан чегарада девор қуришни режалаштирмоқда. Бу ҳақда Польша миллий мудофаа вазири ўринбосари Войсеҳ Скуркевичнинг баёнотига асосланиб, Польшанинг PAP ахборот агентлиги хабар берди.
«Польша—Россия чегарасида ҳали девор қурмаяпмиз, бу ҳақда эълон қилдик, холос», — деди Скуркевич журналистларнинг саволларига жавоб бераркан. Унинг қўшимча қилишича, девор қуриш режалари Польша чегара қўриқлаш хизматини ривожлантириш концепциясига киритилган.
Польша Россиянинг Калининград вилояти билан чегарадош. Чегаранинг қуруқликдаги қисми узунлиги 203,3 километрни ташкил этади.
Калининград вилояти ҳукумати матбуот хизмати раҳбари Дмитрий Лисковнинг «РИА Новости»га айтишича, Россия—Польша чегарасида Россия томонда аввалдан панжара бор. Польша томонида эса йўқ, шу сабабли мамлакат уни қурмоқчи. Гап айнан панжара ҳақида кетмоқда, девор ҳақида эмас, деди Лисков.
2022 йилнинг январь ойида Польша Беларусь билан чегарада девор қуришни бошлади. Унинг узунлиги 186 километр, баландлиги беш метрдан ошади. 644 миллион Польша злотийси (162 миллион доллар) қийматидаги қурилиш июнь ойида якунланиши режалаштирилган.
Польша миграция инқирози туфайли Беларусь билан чегарада девор қуришга мажбур бўлмоқда. Литва ҳам шундай панжара қуришга қарор қилган.
Изоҳ (0)