«ПСЖ» ҳамон Килиан Мбаппени ўз сафида олиб қолиш учун ҳаракат қилмоқда.
The Independent’нинг хабар қилишича, парижликлар футболчи учун ҳафтасига 1 миллион евро маош ваъда қилмоқда. Бу эса ўз-ўзидан Килианни дунёнинг энг кўп маош олувчи футболчисига айлантиради. Француз ҳозирча қарор қабул қилишга шошилаётгани йўқ, унинг вакиллари якуний жавоб ёзда айтилишини билдирди.
El Mundo нашрига кўра, Франция президенти Эммануэль Макрон Мбаппени «ПСЖ» билан шартномани узайтиришга чақирган. Франциянинг собиқ президенти Николя Саркози ҳам шундай чақириқ билан Килианга мурожаат қилган.
23 ёшли Мбаппе 2017 йилда «Монако»дан «ПСЖ»га ижара асосида ўтган эди. 2018 йилда парижликлар 145 миллион еврога футболчини тўлиқ сотиб олган. Жорий мавсум ҳужумчи барча мусобақалар доирасида 32 та ўйинда майдонга тушиб, 22 та гол ва 16 та голли узатма муаллифига айланди.
Мбаппенинг «ПСЖ» билан амалдаги шартномаси 2022 йил ёзида ўз ниҳоясига етади. Аввалроқ ҳужумчининг «Реал»га ўтиши ҳақида бир нечта хабар янграганди.
Изоҳ (0)