Forbes версияси бўйича украиналик энг бадавлат бизнесмен Ринат Ахметов энг катта активи — «Метинвест» холдингининг штаб-квартираси жойлашган Мариупол шаҳрига келди. Бу ҳақда бизнесменнинг активларини бирлаштириб турувчи System Capital Management холдингининг Facebook’даги саҳифасида маълум қилинди.
«Мариупол. Қадрдон ерим», — дейилади Ахметов, халқ депутати Вадим Новинский тасвирланган сурат изоҳида.
«Украинская правда» нашри 13 февраль куни Киевдан ичида украиналик олигарх ва бизнесменлар бўлган 20 га яқин чартер рейс ҳамда шахсий самолётлар учиб кетганини маълум қилганди.
Нашр Ахметовнинг чартер самолёти Украинадан Швейцариянинг Цюрих шаҳри томон йўл олганини ёзган. Шу билан бирга, бошқа бир манба Ахметовнинг ўзи Украинадан 30 январда чиқиб кетганини билдирганди.
Ушбу мақоладан сўнг Ахметовнинг матбуот котиби Анна Терехова бизнесмен 16 февраль куни Мариуполга қайтишини маълум қилган.
Украина президенти Владимир Зеленский бизнесмен ва депутатлар кетиб қолаётгани тўғрисидаги хабарлардан сўнг, улар «ўзларига аллақачон ҳукм чиқариб бўлди» деганди. «Улар ўз корхоналарига, ўзлари ва давлат учун ишлаётган ўн минглаб ишчилари олдига қайтиши керак деб ҳисоблайман», — деган Зеленский. Бундан ташқари, давлат раҳбари Олий Раданинг хорижга чиқиб кетган депутатларини 24 соат ичида мамлакатга қайтишга чақирган.
Ғарб ОАВлари 2021 йил октябридан буён Россия Украинага ҳужум қилишга тайёрланаётгани ҳақида огоҳлантирмоқда. Охирги марта Ғарб нашрлари ва агентликлари — Bloomberg, Spiegel ва Politico Россия Украинага 15—16 февраль куни ҳужум уюштиришни режалаштираётганини ёзган.
Нашр томонидан тилга олинган бизнесменларнинг уч нафари «босқин» хавфи сабаб Украинадан чиқиб кетганини рад этган.
Ринат Ахметов — энг бадавлат украиналик, Forbes унинг бойлигини 7,6 миллиард долларга баҳолаган. Украина жануби-шарқида зиддият бошлангунга қадар унинг бойлиги 22,3 миллиард долларга баҳоланган — ўшанда «Донбасс эгаси» дея таърифланган Ахметов россиялик бизнесменлардан ҳам бойроқ бўлган (Bloomberg’нинг 2013 йилги баҳолаши бўйича). 2014 йилнинг сентябрида агентлик украиналик бизнесменнинг бойлигини 12,7 миллиард доллар деб кўрсатганди.
Ахметовнинг асосий активларини Украинадаги энг йирик молиявий-саноат гуруҳи SCМ Limited бирлаштиради. Унга кўмир, тоғ-кон, кокс-кимё, металлургия ва қувур саноати, кўмир қазиб олиш ва электроэнергетика саноатини бирлаштирувчи Меtinvest B.V. холдингининг 71,24 фоизи тегишли.
Бундан ташқари, SCМ таркибида Биринчи Украина халқаро банки, Cоrum Group машинасозлик, «Портинвест» транспорт компаниялари, «Укртелеком» алоқа компанияси бошқа кўплаб корхоналар киради. Компанияларнинг жами портфели дунёнинг 30 давлатида 500 дан ортиқ корхоналарни ўз ичига олади ва уларда 200 мингга яқин ходим ишлайди.
Изоҳ (0)