Лас-Вегасда 26 февраль куни UFC Fight Night 202 мусобақаси доирасида бўлиб ўтиши режалаштирилган Ислом Махачев ва Бенеил Дариуш ўртасидаги жанг бекор қилинди.
Маълум бўлишича, Дариуш жароҳат олиб сафдан чиқди. Натижада Ислом Махачевнинг рақиби ўзгарди. Исломга бу жангда америкалик Бобби Грин рақиблик қиладиган бўлди.
Грин сўнгги иккита жангида Ал-Яквинта ва Насрат Ҳақпарастни мағлуб этганди.
Махачев эса охирги жангини 2021 йилнинг октябрида Ден Ҳукерга қарши ўтказиб, 1-раунддаёқ оғритиш усули эвазига ғалаба қозонган эди. Ислом 9 жангдан буён мағлубиятсиз серия қайд этмоқда ва енгил вазн дивизиони рейтингида 4-поғонадан жой олган. Грин эса топ-15 ликка кирмаган.
UFC Fight Night 202 мусобақаси 26 февраль (Тошкент вақти билан 27 февраль тонги) санасида бўлиб ўтиши режалаштирилган.
Изоҳ (0)