Тошкент шаҳри ва Хоразм вилоятида қисқа муддатларда ҳайдовчилик гувоҳномасини олиб бермоқчи бўлган шахслар ушланди, деб хабар бермоқда Бош прокуратура ҳузуридаги департамент.
Департаментнинг Шайхонтоҳур тумани бўлими томонидан ИИВ ходимлари билан ўтказилган тезкор тадбирда фуқаро Р.М. ва бошқалар ўзаро тил бириктириб, фуқаро Н.га юқори лавозимда ишловчи танишлари орқали қисқа муддатда ўқишга бормасдан ҳайдовчилик гувоҳномасини 900 доллар эвазига имтиҳонсиз олиб беришга ишонтириб, шундан 800 долларни олган вақтида ашёвий далиллар билан ушланган.
Худди шундай департаментнинг Хоразм вилояти бошқармаси томонидан ўтказилган тезкор тадбирда фуқаро Ж.А. фуқаро К.нинг ишончига кириб, унга танишлари орқали вилоят ЙҲХБда ҳайдовчилик гувоҳномасини олиш учун бўлиб ўтадиган имтиҳондан ўтказиб бериши эвазига 300 долларни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Самарқандда дарсларга қатнашмасдан, 20 кунда «права» олиб беришни ваъда қилган хусусий мактаб раҳбари, Сурхондарёда эса 15 кунда «права» олиб беришни ваъда қилган инструктор ушланганди. Бухорода танишлари орқали ҳайдовчилик гувоҳномаси олиб бериш учун 3 миллион сўм пора олган автомактаб ўқитувчиси қўлга олинганди.
Изоҳ (0)