Яккабоғ ҳокими аввалига айтди, кейин қайтди: Жабрини тадбиркор тортмоқда

Қашқадарё вилоятининг Яккабоғ тумани ҳокими Лутфиддин Абдуллаев туманда аукцион савдо орқали сотилган ер ноқонуний сотилганини айтиб, ўз имзоси билан онлайн сотувга чиққан ҳолатни рад этди. Оқибатда эса уй қуришни ният қилиб, ҳаракат бошлаган тадбиркор иши тўхтаб қолди.

Бу ҳақда «Дарё»га шикоят қилган тадбиркор Санжар Шоназаровнинг айтишича, туманда фаолият юритувчи блогерларнинг бу ҳақдаги чиқишига жавоб берган ҳоким Лутфиддин Абдуллаев Telegram’да кўп қаватли уй қуриш учун сотувга чиққан ердан «дом» қурилишига норози эканини, қолаверса, ер сотувга ноқонуний ҳолатда чиққани ҳақида ёзган. Бу эса тадбиркорнинг иши тўхтаб қолишига, туман прокуратурасининг мазкур ҳолат бўйича тергов ишини бошлашига сабаб бўлган.

«2021 йилнинг 8 ноябрь куни аукцион савдо орқали Яккабоғ туманининг ‘Айғиркўл’ маҳалласидан кўп қаватли уй учун сотувга чиқарилган беш сотих ерни сотиб олдик. Сўнгра ҳаракатни бошлаб, кўп қаватли уй лойиҳасини туздик. Шунингдек, қурилиш техникаларини жалб қилиб, ишни бошлаш ҳаракатига тушдик. Шунда тумандаги айрим блогерлар ‘дом’ учун сотилган ер аслида спорт майдони экани, қолаверса, аҳоли бу ерда ‘дом’ қурилишига норози эканини ёзишди. Бу ҳақдаги шов-шувларни бостиришга уринган туман ҳокими эса ўзининг имзоси билан сотувга чиққан ер, ноқонуний сотилганини, ҳудуддан кўп қаватли уй қурилишига ўзи ҳам норози эканини ёзди. Ҳокимнинг бир оғиз гапи билан қурилиш ишларимиз тўхтатилиб, туман прокуратураси суриштирув жараёнларини бошлаб юборди. Ўртада биз тадбиркорлар жабр тортиб қолавердик», — дейди Санжар Шоназаров.

Маълум қилинишича, туманнинг «Айғиркўл» маҳалласидаги кўп қаватли уй учун сотилган беш сотих ер майдони сотилишидан аввал еттита ташкилот хулосаси олинган. Тумандаги масъул ташкилотлар олти ой давомида ўрганиш олиб боргач, «ҳудудда кўп қаватли уй қурса бўлади», деган хулосани беришган. Бироқ туман ҳокимининг Telegram’да ёзган тўрт қатор гапи шунча ташкилот масъулларининг расмий хулосасини шубҳа остида қолдириб, туман прокуратурасининг иш очишига асос бўлган.

«Дарё» сўровига жавоб берган вилоят прокуратураси ҳудудда кўп қаватли уй учун сотувга чиққан ер мутасадди идораларнинг розилиги ва аҳоли томонидан ижтимоий мақсадларда фойдаланиб келинаётганлиги инобатга олинмасдан сотилганини билдирди. Шу боис мазкур ҳолат юзасидан Яккабоғ туман прокуратураси томонидан Жиноят кодексининг 205-моддаси 1-қисми (ҳокимият ёки мансаб ваколатини суиистеъмол қилиш) ва 209-моддаси 1-қисми (мансаб сохтакорлиги) билан жиноят иши қўзғатилиб, дастлабки тергов ҳаракатлари олиб борилмоқда.

«Унда тумандаги еттита ташкилот хулосаси ва шунча вақт ҳамда маблағ сарфланиб, қилинган ишлар бир тийинга чиқиб қоляптими? Унда бизга номи улуғ, аммо қилган иши тан олинмайдиган ташкилотлар нега керак?», — дейди тадбиркор.

Вилоят прокуратурасининг тан олишича, прокуратура иш бошлагач, тадбиркорнинг яхши ниятда бошлаган иши тўхтаб қолган ва тадбиркор салкам 100 миллион сўм зарарга «тушиб турибди».

«Президентимиз тадбиркорга хиёнат — давлатга хиёнат деб турган пайтда, туман ҳокимининг бу ҳаракати тадбиркор манфаатига хиёнат эмасми? Ҳокимнинг бу қилмишини қандай тушуниш ва оқлаш мумкин? Майли, агар ер ноқонуний тарзда аукцион савдога чиққан бўлса, буни қилган еттита ташкилот масъуллари ва ходимлари, бу ишнинг бошида турган туман ҳокими ва ўринбосарлари ҳам жавобгарликка тортилсин. Тадбиркорни сарсон қилаётгани учун қонун олдида жавоб беришсин», — дейди суҳбатдош тадбиркор.

«Дарё» мухбири вилоят прокуратурасининг иш очишга асос сифатида кўрсатаётган — «мутасадди идораларнинг розилиги ва аҳоли томонидан ижтимоий мақсадларда фойдаланиб келинаётганлиги инобатга олинмаган», деган важи қай даражада асосли эканини аниқлаштириш мақсадида хулоса берган еттита ташкилотнинг шу ҳақдаги якуний фикрлари билан танишиб чиқди.

Маълум бўлишича, вилоят Маданий мерос бошқармаси, вилоят Йўл ҳаракати хавфсизлиги бошқармаси, вилоят Экология ва атроф муҳитни муҳофаза қилиш бошқармаси, вилоят Қурилиш бошқармаси, туман Фавқулодда вазиятлар бўлими, туман Сув таъминоти бўлими, туман электр таъминоти бўлими ҳамда туман кадастр бўлими масъуллари мазкур масалани ўрганиб чиқиб, ўз хулосаларини берган. Барча ташкилотлар кўп қаватли уй қурилишига ҳеч қандай эътироз йўқлигини, ҳудуддан уй қурса бўлишини ёзган.   

Жумладан, вилоят прокуратураси кўп қаватли уй қурилаётган жойда сув «дренажи» бор, шунингдек, 10 кВ «Ойбек» ҳаво линияси муҳофаза зонаси экан, деётган ер ҳақида Яккабоғ туман сув таъминоти бўлими бошлиғи А.Туропов аввалроқ, аниқроғи, 2021 йилнинг 8 август куни «ҳудудда ичимлик суви қувурлари мавжуд эмас», дея хулоса берган бўлса, Яккабоғ туман электр таъминоти корхонаси раҳбари А.Менгишев эса «ҳудудда кўп қаватли уй қурилишига тўсиқ йўқ, муҳофаза зонаси сақланган ҳолда қурилиш ишлари олиб борилиши мумкин», дея хулоса берган.

Мазкур масала юзасидан «Дарё» мухбири билан суҳбатлашган туман ҳокими Лутфиддин Абдуллаев тадбиркор сотиб олган ер қонуний равишда аукцион савдога қўйилганини, ҳудудда ҳеч қандай спорт майдони, шунингдек, уй қурилишга халал берувчи катта сув «дренажи» ҳам мавжуд эмаслигини айтиб, тадбиркорнинг кўп қаватли уй қуриши тарафдори эканини билдирди.

«Айғиркўлда ҳеч қандай стадион йўқ. У ер аҳоли томонидан шунчаки стадион сифатида ташкил этилиб, ҳар замонда фойдаланиб келинган. Ҳақиқий стадион бундан сал нарида жойлашган. Қолаверса, менга бошида катта сув ‘дренажи’ бор дейишганди. Кейин билсам, кичкина қувур ўтган экан. Бу қурилишга ҳеч қандай халал бермайди. Ана Япония сув устида кўп қаватли уй қуряпти», — дейди туман ҳокими.

Ҳоким сўзларини тўлдирган ўринбосари Дилшод Менгбоев ҳам аукцион савдо қонуний тартибда ўтказилганини, бу масалада тадбиркорнинг умуман айби йўқлигини, аммо прокуратура текшируви сабаб қурилиш ишлари тўхтаб қолганини айтмоқда.

«Тадбиркор ерни қонуний тартибда аукциондан сотиб олган. Бу ерда тадбиркорнинг айби йўқ, албатта. Биз — ҳокимлик вакиллари ҳам, аҳоли вакиллари ҳам тадбиркорнинг қурилишига қарши эмасмиз. У бемалол ишини давом эттирса бўлади. Фақат айни пайтда вазият прокуратура томонидан ўрганилаётгани боис, иш вақтинча тўхтатилган. Кейинчалик давом эттириши мумкин», — дейди Яккабоғ тумани ҳокимининг қурилиш масалалари бўйича ўринбосари Дилшод Менгбоев.

Давлат кадастрлари палатасининг вилоят бошқармаси Яккабоғ туман филиали мутахассиси Равшан Тўраев ҳам тадбиркорнинг уй қурилишига кадастр масъулларининг ҳеч қандай эътирози йўқлигини, ташкилот хулосаси ҳар томонлама ўйланиб, қонуний тартибда берилганини, тадбиркор бемалол қурилиш ишларини бажариши мумкинлигини маълум қилмоқда.

Туман ташкилотлари, шунингдек вилоят бошқармалари ҳам аукционда сотилган ер учун ижобий хулоса бериб турганда ҳокимнинг бир оғиз сўзи сабаб барча ишларни ноқонуний деб топиш ва прокуратура органларининг аралашуви, шунингдек тадбиркорнинг йиллаб қилинган меҳнатини бир уринишда йўққа чиқариш адолатли иш бўлармикин? Саволлар кўп, жавоблар эса етарли ва асосли эмас.

Қашқадарё вилоятининг Яккабоғ тумани интернет фойдаланувчиларига ҳоким ўринбосарининг ёқиб юборилиш воқеаси сабаб яхши танилганди. Ўшанда тадбиркорга тегишли савдо дўконини бульдозер ҳайдаб, бузишга уринган ҳоким ўринбосари тадбиркор томонидан ёқиб юборилганди. Туманнинг амалдаги раҳбарияти ҳам раҳбарлигининг дастлабки кунлариданоқ жамоатчилик эътиборини тортганди. Ҳоким Лутфиддин Абдуллаевнинг 311 миллион сўмга Captiva харид қилиш билан боғлиқ таклифи депутатлар муҳокамасига қўйилганда, бир нафар депутат машина олишга сарфланадиган пулни кам таъминланганларга бериш керак деган таклифни берганди. Қолган депутатлар эса ҳокимнинг янги автомобиль сотиб олишини олқишлаганди. Сотиб олиниши жамоатчилик эътирозига сабаб бўлган Captiva кўп ўтмай ЙТҲга ҳам учради. Туман масъуллари эса яна шов-шувлар гирдобида қолди.