Қашқадарё вилоятининг Қарши шаҳрида жойлашган 1-сонли ихтисослаштирилган умумтаълим мактаби ўқувчилари мактаб дарвозасидан ошиб тушиб, дарсдан қочгани, кейинчалик муштлашгани хабар берилди. Бу ҳақда «Дарё»га хабар берган манбанинг айтишича, мактабнинг дарсдан қочган ўқувчилари 20 нафардан ортиқ бўлган.
«Ўқувчилар дарс пайтида мактаб ҳовлисининг орқа томонидаги дарвозасидан ошиб тушиб, шу яқин атрофда бошқа болалар билан муштлашган. Муштлашувга айнан нима сабаб бўлгани номаълум», — дейди «Дарё» манбаси.
Таҳририятга тақдим этилган видеолардан англашилишича, мактаб ўқувчиларининг муштлашувида 50-60 нафар ўқувчи иштирок этган.
Видеотасвирларни изоҳлаган мактаб масъулларидан бири муштлашувда кўринган барча ўқувчилар 1-мактаб ўқувчилари эмаслигини, нотаниш ўқувчилар ҳам борлигини маълум қилган.
«Дарё» мухбири билан суҳбатлашган 1-мактаб директори Зебинисо Турсунова дарсдан қочган ўқувчилар мактабнинг 11-синф ўқувчилари эканини, улар видеода кўринганидек 15-20 нафар эмас, 5-6 нафар бўлганини, ҳолат видеода бўрттириб кўрсатилганини айтди.
«Мактаб биносининг чиқиш қисми қаттиқ назоратда бўлгани сабаб ўқувчилар орқа томондаги дарвозадан кўчага чиқишган. Улар видеода кўринганидек 15-20 нафар эмас, 5-6 нафар ўқувчи бўлган. Ҳолат видеода бўрттириб кўрсатилган», — дейди мактаб директори.
Мактаб масъулининг қўшимча қилишича, 11-синф ўқувчилари Қарши шаҳридаги 11-сонли мактабнинг юқори синф ўқувчилари билан муштлашган.
«11-мактаб ўқувчилари бизнинг мактабга келиб, ўқувчиларимизни чақиришган. Улар ҳам чиқиб, болалар ўзаро муштлашган. Кеча ва бугун шу ҳолат муҳокама қилинди. Ота-оналарга Маъмурий жавобгарлик тўғрисидаги кодекс билан маъмурий баённома тузилиб, тўпланган ҳужжатлар Қарши шаҳар ИИБга тақдим этилган», — дейди мактаб директори.
Директор айнан неча нафар ота-она жавобгарликка тортилганини билмаслигини, бунга Қарши шаҳар ИИБ аниқлик киритиши мумкинлигини билдирди.
Вилоят ИИБ ахборот хизмати масъуллари эса «Дарё»нинг бу ҳақдаги сўровини жавобсиз қолдирди.
Эслатиб ўтамиз, аввалроқ ижтимоий тармоқларда Қарши шаҳридаги 1-мактаб ўқувчисининг синфхонада сув солинган челакка ҳожатини чиқаргани акс этган видео тарқалганди. Мазкур видеодаги ҳолатни ўрганган вилоят ИИБ ўқувчининг ота-онаси жаримага тортилганини билдирганди. «Дарё» мухбири кейинчалик ҳуқуқбузарлик содир этган мактаб ўқувчисининг отаси Қашқадарё вилоят прокуратурасида масъул лавозимда фаолият юритишини, прокурор сифатида ишлаган масъул қанча миқдорда жаримага тортилгани номаълумлигича қолганини билдирганди.
Изоҳ (0)