Лионель Месси 4 йилдан бери «Реал»га гол ура олмаяпти

Чемпионлар Лигаси 1/8 финалининг дастлабки ўйинида «ПСЖ» ўз майдонида «Реал»ни (1:0) мағлуб этди.

Учрашувнинг 62-дақиқасида парижликлар ҳужумчиси Лионель Месси пенальтидан гол ура олмади. Ушбу вазиятда «Реал» дарвозабони Тибо Куртуа сейв амалга оширди.

Шу тариқа Мессининг Чемпионлар Лигасида ноаниқ амалга оширган пенальтилари сони 5 тага етди. Аргентиналик футболчи бу борада «Арсенал» собиқ ҳужумчиси Тьерри Анрининг антирекордини такрорлади.

Умумий ҳисобда Лионель ушбу турнирда 23 марта пенальти тепган.

Шунингдек, Месси «Реал» дарвозасига илк марта пенальтидан гол ура олмади. У бунгача «Барселона»да ўйнаган пайтдаги 6 та уринишининг барчасини муваффақиятли амалга оширганди.

Бундан ташқари, Месси кетма-кет 8 учрашувдан бери Мадрид клуби дарвозасига йўл топа олмаяпти. У «Реал»га ўзининг сўнгги голини 2018 йилнинг май ойида урган. Ҳужумчи бу вақтда «Барселона»да тўп сурарди.

Ушбу ғалаба, шунингдек, Мессининг Мадрид клубига қарши ўйинлардаги ғалабасиз серияси якун ясаб берди.

«Барселона»нинг собиқ футболчиси 2019 йилнинг март ойидан бери «Реал»ни мағлуб эта олмаётганди — 3 мағлубият ва 1 дуранг.

Месси «қироллик клуби»га қарши 46 ўйинда майдонга тушиб, 26 та гол ва 14 голли узатмага муаллифлик қилган.