Россиянинг Жанубий ҳарбий округ қўшинлари машғулотлардан сўнг Қримни тарк этди (видео)

Россия Қуролли кучларининг Жанубий ҳарбий округ бўлинмалари Қримда жойлашган полигонлардаги тактик машғулотлар якунлангач ярим оролни тарк этди. Бу ҳақда Россия мудофаа вазирлигига таяниб, Meduza хабар берди.

Ҳарбий хизматчилар ва ҳарбий техника, жумладан, танклар, пиёда аскарларнинг жанговар машиналари ва артиллерия мосламалари темир йўл орқали доимий жойлашиш пунктларига қайтмоқда. Ҳарбийларнинг маълумотларига кўра, қўшинлар аллақачон Қрим кўприги орқали Керч бўғозини кесиб ўтган.

Машқлар якунланишидан олдин «Довул» ва «Град» кўп марталик ўт очиш реактив тизимларининг экипажлари Керчдан 40 километр узоқликдаги Опук полигонида жонли ўқ отиш амалиётларини бажарган. Мудофаа вазирлиги машғулотлар видеосини эълон қилди.

15 февраль куни Мудофаа вазирлиги Ғарбий ва Жанубий ҳарбий округ бўлинмалари машғулотлардан сўнг ҳарбий гарнизонларга қайтишга ҳозирлик кўраётганини маълум қилди. Вазирлик айнан қайси ҳудудлардаги ҳарбийларнинг қайтишига аниқлик киритмаганди. Идорада таъкидланишича, бошқа ҳарбий округлар, флот ва ҳаво-десант бўлинмалари ўқув машғулотларини давом эттирмоқда.

Conflict Intelligence Team (CIТ) суриштирув гуруҳи 13 февраль ҳолатига Қора денгизда 11 та йирик десант кемасидан иборат гуруҳ борлигини маълум қилганди. Бундан ташқари, Қора ва Ўрта ер денгизларида учта 1164 «Атлант» лойиҳасининг ракета крейсерлари бошчилигидаги учта крейсер зарба берувчи гуруҳ жойлашганди.

CIТ асосчиси Руслан Левев 6 февраль куни «Дожд» телеканалига айтишича, Қримдаги Опук полигонида «Қодировлар» — Грознийда жойлашган ва Россия гвардияси таркибига кирувчи «Север» полки кузга ташланган. Ушбу бўлинманинг Грознийга қайтган ёки йўқлиги ҳали номаълум.

Ғарб давлатлари маълумотларига кўра, Россия Украина чегаралари яқинида 100-150 минг қўшин тўплаган, улар Россия Украинага бостириб киришидан хавотида. Россия эса қўшинларнинг ҳаракатини ҳарбий машғулотлар билан изоҳламоқда.

Аввалроқ АҚШ Россиянинг Украина билан чегара ҳудудидан ҳарбий қўшинларини ҳақиқатда бошқа ерга кўчираётганини текшириб, барчасига ишонч ҳосил қилмоқчилигини билдирди.