Қирғизистон ҳукумати нарх-навонинг ўсишини тўхтата олмайди, шунинг учун маошлар, пенсия ва нафақаларни «кескин оширмоқчи». Бу ҳақда 1 февраль куни бўлиб ўтган матбуот анжуманида Вазирлар Маҳкамаси раиси Оқилбек Жапаров маълум қилди, деб ёзади Kaktus.media.
Бош вазирнинг сўзларига кўра, бутун дунё бўйлаб нархлар ошиши кутилмоқда, республика товарларнинг 67 фоизини импорт қилиши сабабли инфляция ҳам «импорт бўлиб келмоқда».
«Биз халқимиз фаровонлигини кўтаришимиз керак. Шунинг учун давлат харажатларини оширяпмиз, бюджет 400 миллиард сомни ташкил этади. 1 апрелдан иш ҳақи, нафақа ва пенсияларни кескин оширамиз. Ўтган йили пенсия, нафақа ва маошлар 19 миллиард сомга ошган. Бу асосан ҳуқуқни муҳофаза қилиш блокига таллуқли бўлган. Энди давлат ва муниципал хизматчиларга, шифокор ва ўқитувчиларга, маданият арбобларига навбат берамиз», — дея Жапаровнинг сўзларидан иқтибос келтиради Kaktus.media.
Унинг таъкидлашича, «Вазирлар Маҳкамаси аниқ ташхисни билади, муолажани тўғри танлайди ва энг муҳими, улар мамлакат иқтисодиётини даволайдиган яхши шифокорлардир».
Апрель ойидан бошлаб иш ҳақи, пенсия ва нафақалар қанча ошишига бош вазир аниқлик киритмаган.
2021 йилнинг декабрь ойида Қирғизистон президенти Садир Жапаров фермерлар ва деҳқон хўжаликларини 3 йилга ер солиғидан озод этиш тўғрисидаги фармонни имзолаган эди. Ундан аввал эса Садир Жапаров Юқори Кенгаш (парламент) депутатларининг маошини қисқартирган. Шунингдек, парламент аъзоларинининг техник харажатлари ҳам камайтирилган эди.
Изоҳ (0)