Адлия вазирлиги сўнгги пайтларда Давлат хизматлари марказларида узун навбатлар кузатилаётгани тўғрисидаги хабарларга муносабат билдирди.
Давлат хизматлари марказларида узун навбатлар кузатилаётгани сабаби ўрганилганда, ташриф буюрувчилар орасида ҳайдовчилик гувоҳномасини ҳужжатнинг янги намунадагисига алмаштириш муддати 2022 йилнинг 1 мартига қадар экани ҳамда шундан кейин ҳайдовчилик гувоҳномаларини алмаштиришда қайта имтиҳон топшириш керак бўлади, деган нотўғри маълумот тарқалгани билан боғлиқ экани аниқланган.
Вазирлик аҳолига қулай бўлиши учун эски ҳайдовчилик гувоҳномасини янги намунадагисига алмаштириш 2022 йил 31 декабрга қадар давом этишини эслатиб ўтган. Бунда қайта имтиҳон варақаси талаб этилмайди.
Эски ҳайдовчилик гувоҳномалари қуйидаги муддатларда янгисига мажбурий алмаштирилади:
- 2010 йилгача берилганлари — 2022 йил 31 мартгача;
- 2010–2012 йилларда берилганлари — 2022 йил 30 июнгача;
- 2013–2015 йилларда берилганлари — 2022 йил 30 сентябргача;
- 2015 йилдан кейин берилганлари — 2022 йил 31 декабргача.
Эслатиб ўтамиз, 3 февраль куни Тошкентда ҳайдовчилик гувоҳномасини олиш учун имтиҳон топшириш бўйича Тошкент имтиҳон маркази иш бошлади. Ички ишлар вазири ўринбосари, жамоат хавфсизлиги департаменти бошлиғи Бекмурод Абдуллаев фақат етарли билим ва малакага эга ҳайдовчиларга гувоҳнома берилишни бошлагач, йўлларда ҳайдовчилик маданияти ошади, йўл-транспорт ҳодисалари камайишини айтиб ўтди.
Изоҳ (0)