Ўзбекистонда коронавирусга қарши вакцина олган фуқаролар учун 750 минг сўм миқдорида пул маблағи берилаётгани ҳақида хабарлар тарқалмоқда. Соғлиқни сақлаш вазирлиги матбуот хизмати бу хабарлар асоссиз эканини маълум қилди.
«Сир эмас, коронавирус пандемияси даврида айрим ижтимоий тармоқ саҳифалари орқали турли асоссиз, ҳеч қандай ҳақиқатга тўғри келмайдиган ва расмий манбалар орқали тасдиқланмаган уйдирма маълумотларни тарқатиш ҳоллари тез-тез кузатилмоқда.
Бу эса, ўз навбатида, кенг жамоатчилик орасида турли тушунмовчиликларнинг юзага келишига, баъзи ҳолларда эса ортиқча саросималарга сабаб бўлмоқда. Жумладан, вакцина олган фуқаролар учун 750 минг сўм миқдорида пул маблағи берилаётгани ҳақидаги юқорида келтирилган ахборот ҳам ана шундай мақсадда тарқатилган бўлиб, ҳеч қандай расмий асосга эга эмас», — дейилади вазирлик ахборотида.
ССВ, шунингдек, аҳолини бу каби фейк хабарларга ишонмасликка чақириб, ёлғон хабарларни тарқатиш тегишли тартибда жавобгарликка сабаб бўлишини эслатиб ўтган.
Эслатиб ўтамиз, Ўзбекистон бўйлаб 2022 йилнинг январь, февраль ва март ойларида эмланганлик сертификатини олган фуқаролар ўртасида ютуқли ўйинлар ташкил қилиниши ва бош совринга автомобиль қўйилиши тўғрисида хабар берилганди. 15 январдан бошлаб мамлакатда «Вакцина — тўғри танлов» ютуқли ўйинлари ташкил этилмоқда ва у 5 ой давомида ўтказилади. Унга кўра, ҳар ҳафта 35 та велосипед, 25 та телевизор, 25 та смартфон ва 25 та планшет ўйналади. Ҳар ойнинг сўнгги шанба кунида эса супер-ютуқ — Malibu автомобили ўйналади.
29 январь куни Zo‘r TV телеканалида орқали ўтказилган ўйинда илк ғолиб аниқланди — Фарғонанинг Фурқат туманидан бўлган фуқаро Malibu эгасига айланди.
Изоҳ (0)