Adliya vazirligi so‘nggi paytlarda Davlat xizmatlari markazlarida uzun navbatlar kuzatilayotgani to‘g‘risidagi xabarlarga munosabat bildirdi.
Davlat xizmatlari markazlarida uzun navbatlar kuzatilayotgani sababi o‘rganilganda, tashrif buyuruvchilar orasida haydovchilik guvohnomasini hujjatning yangi namunadagisiga almashtirish muddati 2022-yilning 1-martiga qadar ekani hamda shundan keyin haydovchilik guvohnomalarini almashtirishda qayta imtihon topshirish kerak bo‘ladi, degan noto‘g‘ri ma’lumot tarqalgani bilan bog‘liq ekani aniqlangan.
Vazirlik aholiga qulay bo‘lishi uchun eski haydovchilik guvohnomasini yangi namunadagisiga almashtirish 2022-yil 31-dekabrga qadar davom etishini eslatib o‘tgan. Bunda qayta imtihon varaqasi talab etilmaydi.
Eski haydovchilik guvohnomalari quyidagi muddatlarda yangisiga majburiy almashtiriladi:
- 2010-yilgacha berilganlari — 2022-yil 31-martgacha;
- 2010–2012-yillarda berilganlari — 2022-yil 30-iyungacha;
- 2013–2015-yillarda berilganlari — 2022-yil 30-sentabrgacha;
- 2015-yildan keyin berilganlari — 2022-yil 31-dekabrgacha.
Eslatib o‘tamiz, 3-fevral kuni Toshkentda haydovchilik guvohnomasini olish uchun imtihon topshirish bo‘yicha Toshkent imtihon markazi ish boshladi. Ichki ishlar vaziri o‘rinbosari, jamoat xavfsizligi departamenti boshlig‘i Bekmurod Abdullayev faqat yetarli bilim va malakaga ega haydovchilarga guvohnoma berilishni boshlagach, yo‘llarda haydovchilik madaniyati oshadi, yo‘l-transport hodisalari kamayishini aytib o‘tdi.
Izoh (0)