Адлия вазирлиги тизимидаги Юридик хизмат кўрсатиш марказлари томонидан республикадаги 9 758 та давлат ўрта таълим мактабларидаги кадрлар хизмати ходимларига ойлик маош тўлаш амалиёти ўрганилди, деб хабар беради вазирлик матбуот котиби.
Ўрганиш ўтказилган мактабларда 9 787 та кадрлар хизмати ходимлари штат бирликлари мавжуд бўлиб, уларда 9 937 нафар (0,5 ставка ҳам қўшиб ҳисоблаганда) ходимлар фаолият юритмоқда. Ушбу ходимларнинг 911 нафари олий маълумотли, 9 026 нафари олий маълумотга эга бўлмаган мутахассислардир.
Вазирлар Маҳкамасининг қарорига кўра, олий маълумотли ходимларнинг лавозим разрядлари — 7-разряд, олий маълумотли бўлмаган ходимларнинг лавозим разрядлари — 6-разряд этиб белгиланган. Бироқ ўрганиш давомида аксарият туман ва шаҳар халқ таълими бўлимлари томонидан мактаблардаги кадрлар бўлими ходимларининг меҳнатга ҳақ тўлаш бўйича лавозим разрядлари паст белгилангани аниқланган.
Хусусан, 160 та ҳолатда 2-разряд, 1 353 та ҳолатда 3-разряд, 48 та ҳолатда 4-разряд, 4 000 та ҳолатда 5-разряд, 4 160 та ҳолатда 6-разряд ва 216 та ҳолатда 7-разряд этиб белгиланган.
Қонунчиликка зид равишда паст разряд бўйича иш ҳақи тўланиш ҳолатлари юзасидан ҳудудий адлия органлари томонидан 1 832 та таъсир чоралари киритилиб, унга кўра 6 038 та ходимнинг лавозим разрядини мувофиқлаштириш сўралган.
Ҳозиргача адлия бўлимлари томонидан кўрилган чоралар натижасида 3 миллиард сўм тўлаб берилган ва қолган қисмини ҳам ундириш чоралари кўрилмоқда.
Аввалроқ Бухорода коронавирусга чалинганлар билан ишлаган 76 тиббиёт ходимининг 6 фоизли қўшимча тўловлари тўлаб берилганди.
Изоҳ (0)