Андижон вилояти Марҳамат туманидаги 72-ИДУМ директори ва туман халқ таълим бўлими мудири лавозимидан озод этилди. Бу ҳақда Халқ таълими вазирлиги хабар қилди.
Қайд этилишича, ўқитувчилар билан ўтказилган бевосита суҳбат натижаларига кўра, мактаб директори ҳамда Марҳамат тумани ХТБ мудирини вазифасидан озод этиш бўйича хулосага келинган.
Шунингдек, 14 февраль куни Андижон вилояти ҳокимлигида бўлиб ўтган ҳокимлик соати йиғилишида вилоят ҳокими Шуҳрат Абдураҳмонов туман ҳокимининг ёшлар масалалари бўйича ўринбосарини лавозимидан озод қилиб, туман ҳокимига ҳайфсан интизомий жазосини белгилаган.
Эслатиб ўтамиз, 8 февраль куни Андижон вилояти Марҳамат туманида ўқитувчилар мактабларда ўқувчиларнинг ўзлаштириши қониқарсиз экани туфайли ота-оналардан узр сўрагани айтилган хабар эълон қилинди. Ҳолат кенг жамоатчилик вакиллари орасида муҳокамага сабаб бўлди. Хусусан, Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов «Шуҳрат Абдураҳмоновнинг шахсан ўзи барча устозлардан узр сўраши керак»лигини ёзди.
Халқ таълими вазири ҳам ҳолатга муносабат билдириб, ўқитувчиларнинг шаънини ерга уришни давлат сиёсатига қарши ҳаракат деб баҳолашини билдирган.
«Ўқитувчи қадрланмаган юрт ҳеч қачон тараққий этмайди. Бу ҳаракат қандай мақсадда амалга оширилгани менга қоронғи, лекин айбдорлар албатта жавоб бериши керак. Шу ўринда мен ўқитувчилардан ўз қадр-қимматларини ерга уришга йўл қўймасликларини сўраб қоламан. Сизнинг бу даражада бошингизни ерга қаратишга ҳеч кимнинг ҳаққи йўқ!», — деган вазир.
Ўқитувчилар узр сўраши ортидан туман ҳокимлиги баёнот билан чиқди. Унда айтилишича, «ўтказилган ушбу тадбир ижтимоий тармоқларда бошқача ҳолатда талқин қилинмоқда. Тадбирда ота-оналар фарзандларнинг буюк келажаги учун ўқитувчилар билан биргаликда ҳаракат қилишга чақирилган».
Кейинроқ Андижон вилояти ҳокими Шуҳрат Абдураҳмонов ҳам ушбу ҳолатга муносабат билдириб, «хатога йўл қўйган ҳар қандай раҳбарга қонунда белгиланган жазо чораларини кўрилишини таъминланишини»ни таъкидлади. Андижон вилояти халқ таълими бошқармаси бошлиғи ва Марҳамат тумани ҳокими ўқитувчилардан узр сўради.
ХТВнинг маълум қилишича, ҳолат юзасидан ўрганиш натижаларига қонуний баҳо бериш учун ҳужжатлар Бош прокуратурага юборилган.
Халқ таълими вазири Бахтиёр Саидов Андижондаги узр сўрашга мажбурланган ўқитувчилар билан учрашди. Вазир ўқитувчилар билан суҳбатлашиб, уларнинг обрўси ва қадр-қиммати давлат сиёсати даражасидаги муҳим масала экани ва уларни обрўсизлантиришга ҳеч ким ҳақли эмаслигини айтган ҳамда юз берган ҳолатни устоз шаънини ерга уриш деб баҳолаган.
14 февраль куни узрбозлик ортидан туман ҳокими ўринбосари Мухтор Қурбонов ишдан олинди. Марҳамат туман ҳокими Бобур Йўлдошев эса ҳайфсан билан қутулиб қолди.
Изоҳ (0)