Andijon viloyati Marhamat tumanidagi 72-IDUM direktori va tuman xalq ta’lim bo‘limi mudiri lavozimidan ozod etildi. Bu haqda Xalq ta’limi vazirligi xabar qildi.
Qayd etilishicha, o‘qituvchilar bilan o‘tkazilgan bevosita suhbat natijalariga ko‘ra, maktab direktori hamda Marhamat tumani XTB mudirini vazifasidan ozod etish bo‘yicha xulosaga kelingan.
Shuningdek, 14-fevral kuni Andijon viloyati hokimligida bo‘lib o‘tgan hokimlik soati yig‘ilishida viloyat hokimi Shuhrat Abdurahmonov tuman hokimining yoshlar masalalari bo‘yicha o‘rinbosarini lavozimidan ozod qilib, tuman hokimiga hayfsan intizomiy jazosini belgilagan.
Eslatib o‘tamiz, 8-fevral kuni Andijon viloyati Marhamat tumanida o‘qituvchilar maktablarda o‘quvchilarning o‘zlashtirishi qoniqarsiz ekani tufayli ota-onalardan uzr so‘ragani aytilgan xabar e’lon qilindi. Holat keng jamoatchilik vakillari orasida muhokamaga sabab bo‘ldi. Xususan, Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi Komil Allamjonov “Shuhrat Abdurahmonovning shaxsan o‘zi barcha ustozlardan uzr so‘rashi kerak”ligini yozdi.
Xalq ta’limi vaziri ham holatga munosabat bildirib, o‘qituvchilarning sha’nini yerga urishni davlat siyosatiga qarshi harakat deb baholashini bildirgan.
“O‘qituvchi qadrlanmagan yurt hech qachon taraqqiy etmaydi. Bu harakat qanday maqsadda amalga oshirilgani menga qorong‘i, lekin aybdorlar albatta javob berishi kerak. Shu o‘rinda men o‘qituvchilardan o‘z qadr-qimmatlarini yerga urishga yo‘l qo‘ymasliklarini so‘rab qolaman. Sizning bu darajada boshingizni yerga qaratishga hech kimning haqqi yo‘q!”, — degan vazir.
O‘qituvchilar uzr so‘rashi ortidan tuman hokimligi bayonot bilan chiqdi. Unda aytilishicha, “o‘tkazilgan ushbu tadbir ijtimoiy tarmoqlarda boshqacha holatda talqin qilinmoqda. Tadbirda ota-onalar farzandlarning buyuk kelajagi uchun o’qituvchilar bilan birgalikda harakat qilishga chaqirilgan”.
Keyinroq Andijon viloyati hokimi Shuhrat Abdurahmonov ham ushbu holatga munosabat bildirib, “xatoga yo‘l qo‘ygan har qanday rahbarga qonunda belgilangan jazo choralarini ko‘rilishini ta’minlanishini”ni ta’kidladi. Andijon viloyati xalq ta’limi boshqarmasi boshlig‘i va Marhamat tumani hokimi o‘qituvchilardan uzr so‘radi.
XTVning ma’lum qilishicha, holat yuzasidan o‘rganish natijalariga qonuniy baho berish uchun hujjatlar Bosh prokuraturaga yuborilgan.
Xalq ta’limi vaziri Baxtiyor Saidov Andijondagi uzr so‘rashga majburlangan o‘qituvchilar bilan uchrashdi. Vazir o‘qituvchilar bilan suhbatlashib, ularning obro‘si va qadr-qimmati davlat siyosati darajasidagi muhim masala ekani va ularni obro‘sizlantirishga hech kim haqli emasligini aytgan hamda yuz bergan holatni ustoz sha’nini yerga urish deb baholagan.
14-fevral kuni uzrbozlik ortidan tuman hokimi o‘rinbosari Muxtor Qurbonov ishdan olindi. Marhamat tuman hokimi Bobur Yo‘ldoshev esa hayfsan bilan qutulib qoldi.
Izoh (0)