Тошкент шаҳридаги Алишер Навоий кўчасида трамвай йўлларини ётқизиш ишлари бошлангани тўғрисида хабарлар тарқалди. Пойтахт ҳокимлиги мазкур ҳолатга муносабат билдирди.
Маълум қилинишича, 2022 йилда Тошкент шаҳридаги кўчаларни тартибга келтириш (таъмирлаш) режасига мувофиқ, 14 февраль куни Тошкентнинг Алишер Навоий кўчасида таъмирлаш ишлари бошланган. Бунда Навоий—Лабзак кўчасидан Навоий—Беруний кўчаларигача бўлган оралиқ буткул таъмирланиши режалаштирилган.
«Бу ишлар Тошкентда янги трамвай линияси ёки тезюрар автобус учун йўлак ташкил қилиш билан боғлиқ эмас», — дейилади хабарда.
Эслатиб ўтамиз, 2016 йилнинг 2 май куни Тошкентда ҳаракатланаётган сўнгги трамвай йўналиши — «Бешқайрағоч» даҳаси ва Отчопар ўртасида қатновчи 17-йўналиш ёпилган ва шу тариқа Тошкент трамвайининг 115 йиллик тарихига нуқта қўйилганди.
2022 йилнинг январь охирларида тележурналист Хайрулла Нуриддинов «Ўзбекистон 24» телеканалида эфирга узатилган «Менимча» кўрсатувида Тошкентга трамвай қатновини қайтариш тарафдори эканини айтиб ўтган эди.
«Шаҳар транспорти мавзуси очилганлигидан фойдаланиб, яна бир таклифни айтмоқчиман. Аҳолига қулай ва сифатли транспорт хизматини кўрсатиш соҳасини такомиллаштириш мақсадида Тошкентга трамвайларни қайтариш керак, менимча. Катта ва гавжум шаҳарга трамвай жуда асқатади. Ҳаммамизнинг эсимизда-ку, ўша қулай, бежирим, бир текисда юрадиган, муҳими, экологияга зарар етказмайдиган қадрдон трамвайларимиз. Билмадим, балки хато қилаётгандирман, лекин бу менинг шахсий фикрим. Агар пойтахт мутасаддиларининг ўрнида бўлганимда, ана шу ташаббус билан чиққан бўлардим», — деганди Хайрулла Нуриддинов.
Маълумот учун, Шавкат Мирзиёев 19 январь куни Тошкент шаҳрида жамоат транспортини ривожлантириш чора-тадбирлари бўйича тақдимот билан танишганди. «Менимча» кўрсатувида транспорт вазирининг тақдимоти президентга маъқул бўлмагани ҳақида сўз борган. Давлат раҳбари 10 февраль куни Самарқанд вилоятига ташрифида «Трамвайни Тошкентга ҳам қайтармоқчимиз. Фуқаролардан бу борада кўплаб хатлар ва мурожаатлар келяпти», — дея қайд этганди.
Изоҳ (0)