Андижон вилоятининг Марҳамат туманидаги 72-ихтисослаштирилган давлат умумтаълим мактабидаги узрбозлик ортидан туман ҳокими ўринбосари ишдан олинди. Ҳокимга эса ҳайфсан берилди. Бу ҳақда вилоят ҳокими Шуҳрат Абдураҳмонов раислигида 14 февраль куни ўтказилган ҳокимлик соатида маълум қилинган, дея хабар берди «Дарё» мухбири.
«Дарё» манбасига кўра, Шуҳрат Абдураҳмонов ҳокимлик соатида Марҳамат туманидаги ҳолатга алоҳида тўхталиб, Марҳамат тумани ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Мухтор Қурбонов ишдан олинганини, туман ҳокими Бобур Йўлдошевга ҳайфсан интизомий жазоси қўлланиб, олти ой давомида ҳеч қандай рағбат пуллари берилмаслигини маълум қилган.
«Вилоят раҳбари туман халқ таълими бўлими мудири иши бўйича Халқ таълими вазири шуғулланаётганини, мудирга қандай чора кўрилишини вазирлик ҳал этишини айтиб, барча шаҳар ва туман ҳокимларига бундай ҳолат қайта такрорланмаслиги лозимлигини уқтирди», — дейди «Дарё» мухбири билан суҳбатлашган манба.
Марҳаматдаги узрбозлик ортидан журналистик суриштирув олиб борган «Дарё» мухбири билан суҳбатлашганлар, жумладан, мактаб директори ҳам ёппасига узр сўраш ташаббуси шахсан ҳоким Бобуржон Йўлдошевга тегишли эканини билдирганди.
2022 йилнинг 8 февраль куни Андижон вилоятининг Марҳамат туманидаги мактабда ўқитувчилар ўқувчиларнинг ўзлаштириши қониқарсизлиги сабаб ота-оналардан узр сўрагани айтилган хабар эълон қилинди. Ҳолат кенг жамоатчилик муҳокамасига сабаб бўлди. Хусусан, Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов «Шуҳрат Абдураҳмоновнинг шахсан ўзи барча устозлардан узр сўраши керак»лигини ёзди. Халқ таълими вазири ҳам ҳолатга муносабат билдириб, ўқитувчиларнинг шаънини ерга уришни давлат сиёсатига қарши ҳаракат деб баҳолашини билдирди. Ҳолатни изоҳлаган туман ҳокимлиги ўтказилган тадбир ижтимоий тармоқларда бошқача талқин қилинганини ёзди. Андижон вилояти ҳокими Шуҳрат Абдураҳмонов ҳам ушбу ҳолатга муносабат билдириб, «хатога йўл қўйган ҳар қандай раҳбарга қонунда белгиланган жазо чораларини кўрилишини таъминланишини» таъкидлади. Сўнгра вилоят халқ таълими бошқармаси бошлиғи ва Марҳамат тумани ҳокими ўқитувчилардан узр сўради. ХТВнинг маълум қилишича, ҳолат юзасидан ўрганиш натижаларига қонуний баҳо бериш учун ҳужжатлар Бош прокуратурага юборилган.
12 февраль куни Халқ таълими вазири Бахтиёр Саидов тумандаги узр сўрашга мажбурланган ўқитувчилар билан учрашди.
Изоҳ (0)