Яманлик исёнчилар январь ойида Бирлашган Араб Амирликлари ва АҚШ ҳарбийларини хавфга қўйган бир қатор ҳужумлар уюштирганидан сўнг, 12 февраль куни АҚШ ҳарбий-ҳаво кучларининг F-22 қирувчи самолётлари гуруҳи БААга келтирилди. Бу ҳақда Al-Arabiya телеканалига таяниб, «Интерфакс» хабар берди.
АҚШ ҳарбий-ҳаво кучлари баёнотига кўра, қирувчи самолётларнинг келтирилиши Вашингтоннинг БААни ҳар томонлама қўллаб-қувватлашидан яна бир далолат. Қайд этилишича, қирувчиларни юбориш буйруғини Пентагон раҳбари Ллойд Остин берган бўлиб, у мазкур қарорни Абу-Даби валиаҳд шаҳзодаси Муҳаммад бин Зайид Ал Наҳаён билан биргаликда мувофиқлаштирган.
Самолётлар БААга АҚШнинг Виржиния штатидаги «Ленгли» ҳаво кучлари базасидан келган.
Январь ойида Яманнинг Эрон томонидан қўллаб-қувватланган хусий исёнчилари БААдаги нишонларга бир қатор ҳужумлар уюштирди, улар муваффақиятсиз тугади. Натижада, БАА ва Қўшма Штатлар исёнчиларнинг ракета ва дронларини тутиб олиш учун ҳаво ҳужумидан мудофаа тизимларини жойлаштирди, БААдаги америкалик ҳарбийлар эса кулбаларни бошпана қилишга мажбур бўлди.
Ямандаги қуролли можаро 2014 йилнинг мартидан бери давом этмоқда. Саудия Арабистони бошчилигидаги араб коалицияси Яман президенти Абду Раббо Мансур Ҳодий қўшинларини мамлакатнинг бир қисмини назорат қилаётган хусий исёнчиларга қарши курашда қўллаб-қувватламоқда. Ғарбнинг фикрича, исёнчиларга Эрон ёрдам бермоқда.
Изоҳ (0)