Россия Мудофаа вазирлиги Американинг ядровий сувости кемаси Курил оролларида Россия чегарасини бузиб киргани ҳақида хабар қилди. Пентагон буни рад этди

12 февраль куни Россия Тинч океани флоти (TOF) кучларининг режалаштирилган машғулотлари ўтказилаётган Курил оролларининг Уруп ҳудудида АҚШ ҳарбий-денгиз кучларининг «Виржиния» тоифасидаги сувости кемаси пайдо бўлди. Бу ҳақда Россия Федерацияси Мудофаа вазирлиги хабар берди.

Сувости кемаси экипажига овозли сувости алоқаси режимида рус ва инглиз тилларида огоҳлантириш хабари юборилган: «Сиз Россиянинг ҳудудий сувларидасиз. Дарҳол кетинг!»

Экипаж сўровни эътиборсиз қолдирган, шунинг учун Россиянинг «Маршал Шапошников» фрегати «тегишли воситаларни» қўллаган. Мудофаа вазирлиги бу воситалар нима эканини очиқламади.

«Америка сувости кемаси ўзиюрар имитатор орқали радиолокацион ва акустик назорат воситаларидаги нишонларни иккита қилиб кўрсатувчи воситани қўллаган ҳамда Россия Федерациясининг ҳудудий сувларини максимал тезликда тарк этди», — дейилади хабарда.

Ушбу воқеа туфайли Москвадаги АҚШ элчихонаси мудофаа атташеси Россия Мудофаа вазирлигига чақирилган. Унга Америка сувости кемаси халқаро ҳуқуқни қўпол равишда бузгани ва Россия Федерациясининг миллий хавфсизлигига таҳдид солаётгани ҳақида нота топширилган.

«Россия Мудофаа вазирлиги АҚШ келажакда бундай ҳолатларнинг олдини олиши зарурлигини таъкидлайди. Россия Мудофаа вазирлиги ўзининг ҳудудий денгизида Россия Федерацияси хавфсизлигини таъминлаш учун барча чораларни кўриш ҳуқуқини ўзида сақлаб қолади», — дейилади хабарда.

АҚШнинг Ҳинд-Тинч океани қўмондонлиги матбуот котиби Кайл Рейнс Америка сувости кемаси Россия ҳудудий сувларида ҳаракат қилгани ҳақидаги Москванинг хабарларини рад этди. У Америка сувости кемаларининг аниқ жойлашувини айтишдан бош тортди, бироқ улар «халқаро сувларда хавфсиз ҳаракат қилишини» қайд этди.

2021 йилнинг июнь ойида Россия Мудофаа вазирлиги Британиянинг Defender эсминеци Қора денгизда Россия чегарасини бузиб кирганини эълон қилганди. Вазирлик маълумотларига кўра, Россия қирғоқ қўриқлаш кемаси огоҳлантирувчи ўқ очган, Су-24М самолёти эса эсминецга «огоҳлантириш бомбардимонини» амалга оширган, шундан сўнг Defender Россия ҳудудий сувларини тарк этганди.

Британия Мудофаа вазирлиги эсминецга бомбалар ташланганини рад этди. Вазирлик кема Украина ҳудудий сувларидан чиқмагани ва халқаро қонунларга зид ҳаракат қилмаганини таъкидлаган.

Воқеа туфайли Британиянинг Москвадаги элчиси Россия Ташқи ишлар вазирлигига чақирилганди.