«Иқтисодий шарҳ» журнали таҳририяти 2022 йил февраль ҳолатига кўра, Ўзбекистонда аҳолига бирламчи бозордан уй-жой хариди учун ажратилаётган фойдали ипотека кредитлари рейтингини тайёрлади.
Кредит шартлари қишлоқлар, шаҳарлар ва пойтахт аҳолиси учун сотиб олинадиган уй-жойнинг жойлашган жойи, дастлабки тўлови, ипотека кредити миқдори, имтиёзли муддатлари, шунингдек, фоиз ставкаларига қараб фарқланади.
Марказий банкнинг 2021 йил статистикасига кўра, банклар томонидан аҳоли учун ажратилган ипотека кредитлар жами 35 946 млрд сўмни ташкил этди.
Натижаларга кўра, Ўзбекистондаги 32 та банкдан 18 та банк ипотека кредити ажратаётгани маълум бўлди.
Қуйидаги банклар ипотека кредитлари тақдим этмайди: «Asia Aliance Bank», «TBC bank», «Universal Bank», «Ўзагроэкспортбанк», «Anorbank», «Туркистон банк», «Madad Invest Bank», «Савдогар банк», «KDB Bank Uzbekistan», «Saderat bank», «Hi-Tech Bank», «Ravnaq bank», «Trast bank», «Poytaxt Bank». Асосан юқоридаги кўрсатилган банкларнинг баъзилари ипотека кредитларини вақтинча тўхтатиб қўйган.
Таҳлилда банклар икки гуруҳга бўлинган, биринчи гуруҳда, бирламчи бозорда қишлоқ жойларга, иккинчи гуруҳда, шаҳарлар ва Тошкент шаҳрига ипотека кредитлари масалалари кўриб чиқилди.
Қишлоқ жойларда
Таҳлилга кўра, қишлоқ жойларида умумий рейтингнинг биринчи қаторидан жой эгаллаган банк «Aloqabank» бўлиб ушбу банк мижозларга қуйидаги шартларда бирламчи бозордан уй-жой сотиб олиш учун ипотека кредитлари тақдим этмоқда: бошланғич тўлов 10 фоиз, йиллик фоиз ставкаси 17 фоиз, муддати 20 йилгача 6 ойлик имтиёзли давр билан, лекин кредитнинг максимал миқдори 267,75 млн сўмдан ошмаслиги лозим.
Кейинги 2-ўринни қуйидаги банклар эгаллади: «Qishloq qurilish bank»,«Асака банк»,«Ўзсаноатқурилишбанк», «Ipoteka bank» ушбу банкларда ипотека кредити ажратилиш шартлари: яъни бошланғич тўлов 15 фоиз, йиллик фоиз ставкаси 17 фоиз, муддати 20 йилгача 6 ойлик имтиёзли давр, кредитнинг максимал миқдори 327,25 млн сўмдан иборат.
Бундан ташқари, қишлоқ жойларда бирламчи бозорда ипотека кредитлари бўйича юқори фоиз ставкалари «Капиталбанк» (26 фоиз), «Ziraat bank» (25 фоиз), «Ipak yo‘li bank» (25 фоиз) томонидан ажратилмоқда.
Қишлоқ жойларга бериладиган 20 турдаги ипотека кредитларидан 14 туридагиси 20 йил муддатга тақдим этилмоқда.
Ипотека кредитилари бўйича катта миқдорни «Капиталбанк» ва InFinbank ажратиб, тахминан 2 млрд сўм ва 1,6 млрд сўм ташкил этади. Бироқ бу банкларда йиллик фоиз ставкаси сезиларли даражада юқори бўлади.
Шаҳарларда ва пойтахтда
Бирламчи бозорга фойдали ипотека кредитларини ажратиш бўйича иккинчи гуруҳда «Асакабанк», «Ўзсаноатқурилишбанк», «Ipoteka bank», «Hamkorbank» етакчилик қилиб, ушбу банклар томонидан қуйидаги шартлар асосида ипотека кредитлари таклиф этмоқда: 6 ойлик имтиёзли давр билан 20 йилгача, максимал миқдори 327,25 млн сўм, йиллик фоиз ставкаси 17 фоиз ва бошланғич тўлов 15 фоизни ташкил этди.
Шу билан биргаликда, Тошкент шаҳрида бирламчи бозорга ипотека кредит ажратиш шартлари республиканинг бошқа шаҳарларидан фарқ қилади, пойтахтда рейтингнинг биринчи поғонасини эгаллаб «Hamkorbank» ва «Халқ банки»да йиллик 17 фоиз ставкада, 6 ойлик имтиёзли давр билан 20 йилгача, қолаверса, ипотека ҳажми 416,5 млн сўмни, дастлабки тўлов эса 15 фоизни ташкил этди.
Тошкент шаҳри бўйича умумий рейтингида «Ўзсаноатқурилишбанк» 15 фоиз бошланғич тўлов, 17 фоиз йиллик ставкаси, максимал 416,5 млн сўм ва 6 ойгача имтиёзли давр билан 3-ўринни эгаллаганини таъкидлаш лозим.
Шунга кўра, шаҳарлар ва Тошкент шаҳридаги бирламчи бозорда ипотека кредити бўйича юқори фоиз ставкалари «Капиталбанк» (26 фоиз), «Davr bank» (25,99 фоиз) банклар томонидан тақдим этилмоқда.
Ҳозирда, шаҳарлар ва пойтахтда бирламчи кўчмас мулк бозоридан уй-жой харид қилиш учун 24 турдаги ипотека кредитларидан 16 таси 20 йил муддатга ажратилмоқда.
Баъзи тижорат банкларида октябрь ойидаги ипотека кредитлар таҳлилига нисбатан фоиз ставкаларининг -0,5 фоиздан -2 фоизгача пасайиши кузатилди.
Шавкат Мирзиёев 2021 йил март ойи бошида аҳолини ипотека кредитлари орқали уй-жой билан таъминлаш тўғрисидаги фармонни имзолаган эди. Шундай қилиб, 2021 йилдан бошлаб ипотека кредитлари бўйича 6 ойлик имтиёзли давр жорий этилди, шаҳарларда эса дастлабки тўлов 20 фоиздан 15 фоизгача пасайтирилди. Ишлаб чиқувчиларга пандемия даврида тақдим этилган имтиёзлар узайтирилди.
Изоҳ (0)