Ўзбекистон 107 давлат орасида 77-ўринда. Шаҳар марказида бир хонали уй учун ижара нархлари қандай?

Шаҳар марказида ойлик ижарага бериладиган бир хонали уйлар нархи бўйича мамлакатлар рейтинги эълон қилинди. 

Рейтингда Ўзбекистон 107 давлат орасида 77-ўринни эгаллади. Ўзбекистонда шаҳар марказида бир хонали уй учун ойлик ижара нархи — 322,27 доллар.

Ижара учун энг қиммат уйлар Гонконг, Сингапур ва БААда, энг арзони эса Непалда кўрсатилган.

МДҲ давлатлари орасида энг арзон ижара нархлари Озарбайжонда қайд этилган — ойига 266,3 доллар. Россияда ойлик ижара ҳақи 412,51 доллар бўлса, Арманистонда — 396,74 доллар, Украинада — 366,11 доллар, Беларусда — 306,17 доллар, Қозоғистонда — 303,85 долларни ташкил этади.

Ўзбекистон ва бошқа мамлакатларда ипотека шартлари қандай? 

Ўзбекистонда қайта молиялаштириш ставкаси юқорироқ кўрсаткични – 14 фоизни кўрсатмоқда. Россияда ушбу кўрсаткич 8,5 фоизга тенг бўлса, Қозоғистонда 10,2 фоизни, Қирғизистонда эса 8 фоизни ташкил қилмоқда.

Ўзбекистондаги йиллик ўртача фоиз ставкаси 17,5 фоиз бўлиб, Россияда бу кўрсаткич 7,7 фоиз, Қозоғистонда 8,4 фоиз, Қирғизистонда эса 12,8 фоиз этиб белгиланмоқда.

Ўзбекистонда ипотека қарзи олишнинг ўртача муддати 17,1 йилни ташкил қилмоқда. Энг кам муддат (9 йил) Қозоғистонда эканлиги таъкидланмоқда. Қирғизистонда нисбатан кўпроқ – 9,8 йилни, Россияда эса энг кўпи – 20,9 йилни кўрсатмоқда.

Энг узоқ муддатли кредитлар ҳам Россияда (30 йил). Қозоғистон ва Қирғизистонда энг кўпи билан 25 йилга, Ўзбекистонда эса 20 йилга бориб тақалади.