Садио Мане «Реал» ёки «Барселона»дан таклиф тушса, «Ливерпуль» билан хайрлашишга тайёр

«Ливерпуль» футболчиси Садио Мане жамоани тарк этмоқчи.

Goal’нинг хабар беришича, ҳужумкор ярим ҳимоячи «Реал» ёки «Барселона»дан таклиф тушса, инглиз клубини тарк этишга тайёр. Мане бу ҳақида ўз агентларини огоҳлантирган. Иккала жамоадан бирида ўйнаш футболчининг болаликдаги орзуси ҳисобланади.

Маненинг мерсисайдликлар билан шартномаси 2023 йил ёзида ўз ниҳоясига етади. Клуб Садиога янги шартнома таклиф қилмай, унинг трансферидан пул ишлаб олмоқчи бўлса, 2022 йил ёзида уни сотиб юборишга мажбур.

Футболчининг «Ливерпуль»ни тарк этишига яна бир сабаб — у Африка тарихидаги энг яхши футболчи бўлиш учун курашмоқчи. Мане «Ливерпуль»да ўзининг энг юқори чўққисига чиқиб бўлди, деб ҳисоблайди. Бошқа жамоага ўтиш унга Чемпионлар Лигасини иккинчи бор қўлга киритиш, шу орқали Самюуэль Это’O, Дидье Дрогба ва Жорж Веалар қаторига қўшилиш имкониятини беради.

Мане ва «Ливерпуль» ҳозирда янги шартнома борасида музокаралар ўтказмаяпти. Ундан ташқари «қизиллар»нинг янги футболчиси Луис Диас Садионинг позициясида тўп суради.

Қайд этиш жоиз, «Реал» 2017 ва 2019 йилларда Манени ўз сафига қўшиб олиш учун уриниб кўрган.

2021/22 йилги мавсумда 29 ёшли футболчи «Ливерпуль»нинг барча мусобақалардаги 26 ўйинида иштирок этиб, 10 та гол ва битта голли узатмани ўз ҳисобига ёздириб қўйди.