Қашқадарё вилоятидаги чигит можароси юзасидан Монополияга қарши курашиш қўмитаси 5 январь куни муносабат билдирилганди. Расмий муносабатда ҳолат ўрганилиши ва ўрганиш натижалари юзасидан қўшимча маълумот берилиши кўрсатиб ўтилган. 2022 йил 3 февраль куни қўзғатилган иш якуни бўйича муносабат эълон қилинди. Қўмита ижтимоий тармоқларда бу борада эътироз ва фикрлар тарқалгани сабаб қўшимча маълумотлар билан бўлишди.
Маълум қилинишича, Монополияга қарши курашиш қўмитасига 2021 йил 23 декабрь куни Самарқанд вилоятида фаолият юритаётган Pet agro oil ҳамда Oil extraction МЧЖларнинг мурожаатлари келиб тушган.
Мазкур мурожаатларда Pet agro oil томонидан тегишли тартибда биржа савдолари орқали Қашқадарё вилоятида жойлашган «Косон бахт текстил» МЧЖдан пахта чигити сотиб олгани, бироқ ушбу чигитни Қашқадарё вилоятидан олиб чиқиб кетишда вилоят ҳокимининг топшириғи билан вилоятнинг «Умакай» мунтазам ЙПХ масканида ҳеч қандай асословчи ҳужжатларсиз вилоят Ички ишлар бошқармаси ЙҲХБ ходимлари томонидан ушлаб туриш каби тақиқлар мавжудлиги билдирилиб, ушбу масалада амалий ёрдам берилиши сўралган.
Ушбу ҳолат юзасидан қўмита томонидан вилоятнинг тегишли ташкилотлари билан биргаликда дастлабки ўрганишлар ўтказилган. Ўрганиш жараёнида Қашқадарё вилояти ҳокимлиги ҳамда Қашқадарё вилояти Ички ишлар бошқармаси томонидан «Рақобат тўғрисида»ги қонуннинг 12-моддаси талаблари бузилган деб топилиб, уларга нисбатан 2022 йил 6 январь куни иш қўзғатилган.
Қўзғатилган иш жараёнида Қашқадарё вилояти ҳокимлиги, вилоят Ички ишлар бошқармаси масъуллари ва қўмита ходимлари бир неча маротаба онлайн учрашувлар ўтказиб, суриштирув ишлари олиб борган.
Юқоридагиларга асосан Қашқадарё вилояти ҳокимлигига ҳамда вилоят Ички ишлар бошқармасига қонунбузилиш ҳолатлари бўлгани, тадбиркорлик субъектларининг чигит маҳсулотларини Қашқадарё вилоятидан олиб чиқиб кетишига тўсқинлик қилмаслик ҳамда ушбу қонунбузилиш ҳолатларига келгусида йўл қўймаслик чораларини кўриш бўйича 2022 йил 12 январь куни 11/2-сонли иш қўмита кўрсатмаси берилган.
Шундан сўнг юқорида кўрсатилган тадбиркорлар томонидан 20 январь куни ўзларига тегишли бўлган чигит маҳсулотларини Қашқадарё вилояти ҳудудидан олиб чиқиб кетган. Тадбиркорлар томонидан қўмитага эътироз йўқлиги, улар ўз маҳсулотларини айнан қўмитанинг аралашувидан сўнг олиб чиқиб кетилгани ҳақида маълум қилган.
Иқтисодчи Отабек Бакировнинг Telegram каналида эълон қилган постидаги МЧЖлар қўмитага мурожаат қилмаган. Шунингдек, Олий Мажлис Қонунчилик палатаси депутати Расул Кушербаев ўзининг Telegram каналида «Тақиқ қўйганлар иқтисодиётга ва тадбиркорларга етказган зарари учун қандай жазоланди? Чунки бу орада чигит янги маҳсулотга айланиб, аллақачон савдо расталарида турган бўларди. Қўмита буни ҳам оҳиригача олиб бориши керак. Зеро қонун устувор-жазо муқаррар», дея таъкидлаб ўтган.
Монополияга қарши курашиш қўмитасининг маълум қилишича, ҳолат бўйича «Рақобат тўғрисида»ги қонун талаблари бузилган ёки бузилмагани аниқланиб, иш қўзғатилади ва қонун бузилишига йўл қўйганларга нисбатан (Қашқадарё вилояти ҳокимлиги ва Қашқадарё вилояти ИИБ га) кўрсатма хати юборилади (қўмита жазога тортиш, жарима қўллаш ёки бошқа жавобгарлик белгилаш ваколатига эга эмас).
«Агар давлат бошқаруви органлари, маҳаллий давлат ҳокимияти органлари ва улар мансабдор шахсларининг рақобат тўғрисидаги қонунчиликни бузувчи ҳаракати (ҳаракатсизлиги) туфайли хўжалик юритувчи субъектга ёхуд бошқа шахсга зарар етказилган бўлса, у ҳолда мазкур зарарнинг ўрнини қоплаш юзасидан қонунчиликда белгиланган тартибда тадбиркор судга мурожаат этиши мумкин», — дейилади муносабатда.
Эслатиб ўтамиз, 2020 йилда ҳам 3 та вилоятда бу каби ҳолат кузатилган. Қўмита томонидан 2020 йил 27 ноябрда «Рақобат тўғрисида»ги қонунининг 12-моддаси талаблари бузилганлиги ҳолати юзасидан Вазирлар Маҳкамасининг 2005 йил 12 октябрдаги 225-сонли қарорига мувофиқ Қашқадарё, Хоразм ва Сурхондарё вилоят ҳокимликларига ҳамда ушбу вилоятларнинг ИИБларига нисбатан Қўмита томонидан 2020 йил 27 ноябрда иш қўзғатилган эди. Қонунчилик талаблари бузилгани ўз тасдиғини топгани сабабли ҳокимликларга ва вилоятларнинг ИИБларига нисбатан қўмитанинг қарори қабул қилинган ва кўрсатмаси берилган эди.
Изоҳ (0)