Ўзбекистон Олий таълим муассасаларида анъанавий таълим жараёнлари 7 февралдан босқичма-босқич бошланиши тўғрисида хабар берилганди. Олий ва ўрта махсус таълим вазирлигининг маълум қилишича, ҳудудлардан келиб таҳсил олаётган талабаларнинг жойлашиши тўлиқ назоратга олинган.
Шунингдек, талабаларга қулайлик яратиш, доимий яшаш ҳудудидан таълим муассасаларига исталган вақтда етиб келишларини мувофиқлаштириш мақсадида олий таълим муассасалари талабалар турар жойларида жадвал асосида тюторлар (талабаларга қўшимча дарс ўтувчи ўқитувчилар) жамоасидан иборат 24 соатлик навбатчилик ташкил этилган.
Бундан ташқари, талабаларни турар жой билан таъминлаш ишларини мувофиқлаштириш сектори томонидан ижара уй топишга қийналаётган талабалар муаммоларини бартараф қилиш учун маҳалла раислари ва ИИБ профилактика инспекторлари билан ҳамкорликда иш олиб борилмоқда.
Таъкидланишича, бугунги кунга келиб, ҳудудлардан 36 738 нафар талаба Тошкент шаҳрига етиб келган. Уларнинг 10 032 нафари олий таълим муассасаларидаги талабалар турар жойларига, 18 204 нафари ижара хонадонларига, 8 502 нафари яқин қариндошлариникига жойлашган.
Эслатиб ўтамиз, талабаларга қулайлик яратиш, доимий яшаш ҳудудидан таълим муассасаларига хавфсиз, тирбандликларсиз етиб келишлари, жойларда авиа ва темир йўл чипталарини алмаштиришдаги ноқулайликларнинг олдини олиш ҳамда талабаларнинг ижара уйлари ва ётоқхоналарига ортиқча қийинчиликларсиз жойлашишларини таъминлаш мақсадида олий таълим муассасаларида ўқув жараёнлари 7 февралдан 24 февралга қадар босқичма-босқич анъанавий шаклга ўтказилмоқда.
Мавзуга доир: Абдуқодир Тошқулов Қашқадарё ОТМларидаги талабаларга Telegram орқали дарс берилганини танқид қилди
Изоҳ (0)