Тошкент вилоятида Татаристоннинг «Химград» технополиси билан ҳамкорликда «Чирчиқ» кимё-индустриал технопарки ташкил этилади, деб хабар беради Norma. Президент 3 февраль куни тегишли қарорни имзолаган.
Технопарк Олмалиқ кон-металлургия комбинатининг нодир металлар ва қаттиқ қотишмалар ишлаб чиқариш бўйича илмий-ишлаб чиқариш бирлашмаси ҳудудининг ҳамда «Максам-Чирчиқ» 51-сон металли натрий ишлаб чиқариш цехининг жами 31,24 гектар майдонида ташкил этилади.
Ушбу технопарк фаолиятининг асосий йўналишлари этиб қуйидагилар белгиланди:
- юқори қийматга эга бўлган, ташқи бозорда харидоргир ва импорт ўрнини босувчи маҳсулотлар ишлаб чиқаришни ташкил этиш учун хорижий ва маҳаллий инвестицияларни кенг жалб қилиш;
- халқаро стандартларга мувофиқ энергия тежамкор, атроф-муҳит муҳофазасини таъминлашга қаратилган ва экологик хавфсиз ишлаб чиқариш қувватларини барпо этиш;
- Тошкент вилоятининг ишлаб чиқариш ва ресурс салоҳиятидан комплекс ҳамда самарали фойдаланишни таъминлаш орқали маҳсулот экспорт салоҳиятини ошириш мақсадида ҳудудда ишлаб чиқаришни кенгайтириш;
- технопарк иштирокчилари ўртасида ва бутун республика миқёсида мустаҳкам саноат кооперацияси алоқаларини ўрнатиш орқали маҳаллий хом ашё ва материаллар асосида юқори технологик маҳсулотлар ишлаб чиқариш ва маҳаллийлаштириш жараёнларини жадаллаштириш;
- технопарк иштирокчилари учун ягона ишлаб чиқариш инфратузилмасини, шунингдек, сертификатлаш, лаборатория, кадрлар тайёрлаш ва бошқа зарур хизматларни кўрсатиш инфратузилмасини яратиш.
Технопарк ҳудудида МИЗ учун белгиланган алоҳида солиқ, божхона ва валюта тартиботлари амал қилади. Бунда Солиқ кодекси ва «Махсус иқтисодий зоналар тўғрисида»ги қонунда белгиланган солиқ имтиёзлари, шунингдек, божхона тўловлари бўйича имтиёзлар технопарк иштирокчилари, дирекция ва бошқарув компанияси томонидан киритилган инвестициялар ҳажмидан қатъи назар, 10 йил муддатга берилади.
Технопарк иштирокчиларига Тадбиркорлик фаолиятини қўллаб-қувватлаш давлат жамғармаси томонидан инвестиция лойиҳаларини амалга ошириш доирасида, шу жумладан, айланма маблағларни тўлдириш учун бериладиган банк кредитлари суммасининг 50 фоизигача, бироқ 8 миллиард сўмдан кўп бўлмаган миқдорда кафилликлар, инвестиция лойиҳаларини амалга ошириш учун ажратиладиган кредитлар бўйича фоиз харажатларини қоплаш учун компенсациялар тақдим этилади.
21 январь куни Татаристон бош вазири ўринбосари — саноат ва савдо вазири Алберт Каримов бошчилигидаги делегация аъзолари Чирчиққа ташриф буюриб, ушбу технопаркда олиб борилаётган қурилиш ишлари билан яқиндан танишган.
Изоҳ (0)