2021 йилда банклар 9,7 триллион сўм миқдорида ипотека кредитлари ажратди. Бу ҳақда Марказий банк изоҳ берди.
Мазкур суммадан 7,3 триллион сўм бирламчи бозорга келиб тушган бўлса, 2,4 триллион сўм иккиламчи бозорга тўғри келади.
«Янги тартиб» доирасида 4,8 триллион сўм миқдорида кредитлар берилган. Улардан:
- 2,4 триллион сўм – бир ва икки хонали уйлар учун;
- 2 триллион сўм – уч ва ундан кўп хонали уйлар учун;
- 320 миллиард сўм – алоҳида уйлар хариди учун тақдим этилган.
Ипотека кредитларини қайта молиялаштириш бўйича компания ҳисобидан 1,9 триллион сўм ажратилди.
Йил сўнгига келиб ипотека бўйича қолдиқлар 35,8 триллион сўмни ташкил қилди. Бу ўтган йилги кўрсаткичга қараганда 26,8 фоизга кўпроқ ҳисобланади.
Марказий банкнинг таъкидлашича, ипотекага бўлган талаб барқарор даражада юқори бўлиб қолмоқда. Бу бир неча омиллар орқали изоҳланади:
- иқтисодий кўрсаткичларнинг жадал ўсиши (ўтган йилнинг мос даврига нисбатан ялпи ички маҳсулот 7,4 фоизга, аҳоли жон бошига ялпи ички маҳсулот 5,3 фоизга ҳамда асосий капиталга бўлган инвестициялар 5,2 фоизга ўсиши);
- аҳоли сонининг доимий ўсиб бориши (2022 йил 1 январь ҳолатига аҳоли сони 35,2 миллион. кишини ташкил этиб, ўтган йилнинг мос даврига нисбатан 102,1 фоизни ташкил этиши);
- республикада инвестицион фаолликнинг ошиши натижасида қурилиш соҳасида фаолият олиб бораётган тадбиркорлик субъектларининг иқтисодий тармоқлардаги улуши ошиши;
- янги тартиб жорий этилиши натижасида тижорат банклари ипотека кредитлари ажратиш учун барқарор ресурс манбаи билан таъминланаётгани;
- иккиламчи ипотека бозоридан уй-жой сотиб олиш, якка тартибдаги уй-жой қурилиши учун ва улушдор жисмоний шахсларга ажратиладиган ипотека кредитларининг соддалаштирилгани билан изоҳланади.
Юқорида қайд этилган ва бошқа бир қатор омиллар натижасида 2018—2021 йиллар давомида ипотека кредитлари қолдиғи 2,6 баробарга (22,0 триллион сўмга), ипотека шартномалари сони эса қарийб 1,8 баробарга (121,0 минг донага) ошган. (1-расм).
Қаерда ипотека кредитлари кўпроқ олинган?
2021 йилда ипотека кредитларининг (60,2%) яримидан кўпи бешта минтақага тўғри келди:
- Тошкент — 27,2 фоиз;
- Фарғона вилояти — 9,4 фоиз;
- Самарқанд вилояти — 9 фоиз;
- Сурхондарё вилояти — 7,5 фоиз;
- Андижон вилояти — 7,2 фоиз.
Аҳолининг қайси қисми томонидан кўпроқ ипотека кредитлари олинган?
2021 йилда мижозларнинг яримидан кўпи — 31 ёшдан 50 ёшгача бўлган фуқаролар (69 фоиз) ташкил қилди. Иккинчи ўринда 18 ёшдан 30 ёшгача бўлган фуқаролар (24 фоиз) бўлса, учинчи ўринни эса 50 ёшдан ошган ўзбекистонликлар ташкил қилмоқда.
Ипотека учун қанча тўланади?
2021 йилда ипотека бўйича ўртача фоиз ставкаси 17 фоизни кўрсатган. Марказий банк тахминий тўловларни тўлаш бўйича маълумотлар кўрсатилган жадвални тақдим этади.
Аввалроқ Ўзбекистон ва бошқа мамлакатлардаги ипотека шартлари ҳақида хабар берилган эди.
Изоҳ (0)