Перу бош вазири Эктор Валер Пинто уйдаги зўравонлик айбловлари туфайли истеъфога чиқишини маълум қилди. У мазкур лавозимда уч кун ишлади, деб ёзмоқда «ТАСС».
«Мен ўта ўнгчиларга алоқадор Перу газеталари томонидан етказилган мағлубиятни қабул қиламан», — деди у бош вазирликка тайинланганининг тўртинчи куни давлат телевидениесига. «Айбловлар ёлғон маълумотларга асосланган. Буни ҳақиқат деганларни судга бермоқчиман».
1 февраль куни Перу президенти Педро Кастилло янги Вазирлар Маҳкамаси таркибини қабул қилганди, бу давлат раҳбарининг 2021 йил июль ойида лавозимига киришганидан бери учинчи ҳукумати.
Аммо маҳаллий ОАВ янги бош вазир устидан 2016 йилда унинг рафиқаси ва қизи оиладаги зўравонлик учун икки марта шикоят қилгани ҳақида хабар тарқатган. Ўз навбатида Пинто «зўравон» эмаслигини айтиб, ҳеч қачон судланмаганини даъво қилди.
Аввалроқ Перуда бир ҳафта ичида иккинчи вазир истеъфога чиқгани, Перу прокуратураси мамлакат президентини лавозимни ошириш ишларига аралашганликда гумонлаб, сўроққа тутмоқчилиги хабар қилинганди.
Январь охирида Перу ҳукумати мамлакат пойтахти Лима ва унга ёндош Каляо автоном округида жиноятчилик ортиб кетгани боис 45 кунга фавқулодда ҳолат жорий этиш тўғрисидаги қарорни маъқуллаганди.
Изоҳ (0)