Самарқанд ва Қашқадарё вилоятларини боғловчи Тахтақорача довони қалин қор ёғгани туфайли вақтинча ёпилди, деб хабар бермоқда Фавқулодда вазиятлар вазирлиги.
6 февраль куни соат 11:00 дан Қашқадарё вилоятининг Китоб туманидан ўтган М-39 автомобиль йўлининг Тахтақорача довони автомобиллар ҳаракати учун вақтинча ёпилган.
«Айни дақиқаларда ФВВ раҳбарлигида тегишли ташкилотларнинг мутахассислари томонидан вазият оқибатларини бартараф этиш борасида кенг кўламли профилактик ишлар амалга оширилмоқда. Тахтақорача довонининг қайта очилиши бўйича ФВВ матбуот хизмати қўшимча маълумот тақдим этади», — дейилади хабарда.
Йўл ҳаракати хавфсизлиги хизмати йўлларни қордан тозалаш, музламаларни бартараф қилиш мақсадида қум-туз аралашмасини сепиш ишлари амалга оширилаётганини маълум қилган.
Эслатиб ўтамиз, «Ўзгидромет» якшанба куни тоғолди ва тоғли ҳудудларда баъзи жойларда ёғингарчилик кучли бўлиши мумкинлигини, тоғли автомобиль йўлларда қор уюмлари ва кўриниш ёмонлашиши кутилаётганини хабар берганди.
Изоҳ (0)