Наманганга Покистоннинг Панжоб вилояти губернатори Муҳаммад Сарвар Чаудхри бошчилигидаги делегация келди. Бу ҳақда «Дарё» мухбири Азизбек Абдувалиев хабар бермоқда.
Меҳмонларни Наманган халқаро аэропортида вилоят ҳокими Шавкат Абдураззоқов ва унинг ўринбосарлари кутиб олди.
Наманган шаҳридаги «Маърифат маркази» биносида Покистон делегациясининг расмий қабули бўлиб ўтди.
Қабул давомида бундан роппа-роса бир йил аввал «Биродарлашган ҳудудлар» дея эълон қилинган Наманган ва Панжоб вилоятлари ўртасида амалга оширишга киришилган илк лойиҳалар тақдимотлари ўтказилди.
Шунингдек, меҳмонларга Наманганнинг инвестициявий салоҳиятини акс эттирувчи фильм намойиш этилди.
«Покистоннинг энг йирик вилояти бўлган Панжоб билан алоқаларни янада мустаҳкамлаш биз учун муҳим аҳамиятга эга. Хусусан, Наманган вилоятида олий ўқув юртлари сонини ошириш, тиббиёт кластерини яратиш бўйича ҳамкорликдаги амалий ишларимизни изчил давом эттирамиз», — деди Шавкат Абдураззоқов.
Панжоб вилояти губернатори бошчилигидаги делегация Наманган шаҳрининг Давлатобод туманида барпо этишга киришилган New Namangan city — Янги Наманган шаҳарчасида бўлди.
Делегация таркибидаги тадбиркорлар ушбу шаҳарчада ўз лойиҳалари билан иштирок этиш истагини билдирди.
Шунингдек, делегация «Юксалиш», «Ёшлар», «Кушон» кичик саноат зоналарида бўлди. Glass expo, Аrt Soft Ceramics, Hydro Plast корхоналари, Adim Namangan бренди томонидан бунёд этилаётган текстил кластери, Hugo Boss бренди остида кийимлар ишлаб чиқарилиши режалаштирилган «Люкс Плюс Сервис» МЧЖ фаолияти билан танишди.
Панжоб вилояти делегациясининг Наманганга сафари давом этмоқда.
Изоҳ (0)