Қашқадарёда қарзни ундиришга келган МИБ ходимларини урган шахс қамалди

Қашқадарё вилояти Чироқчи туманида Мажбурий ижро бюроси ходимларига қаршилик кўрсатган фуқарога суд ҳукми ўқилди. Бу ҳақда Nasafnews хабар қилди.

Қайд этилишича, МИБ Чироқчи туман бўлими бошлиғи ўринбосари ва 3 нафар давлат ижрочиси 2021 йилнинг 28 октябрь куни Чироқчи туман судининг ижро варақасига асосан даъвогар А.Ч.нинг фойдасига 113 миллион 330 минг қарздорликни ундириш мақсадида жавобгар А.М.нинг яшаш уйига борган.

Қарздорликни ундириш мақсадида унинг ҳовлисида турган бир бош отни хатламоқчи бўлишганида фуқаронинг акаси Ж.М. хизмат вазифасини бажараётган ҳокимият вакилларининг қонуний фаолиятига фаол қаршилик кўрсатиб, уларни ножўя сўзлар билан ҳақорат қилган. Дастлаб давлат ижрочиси М.Х.ни, сўнгра уларни ажратиш мақсадида келган давлат ижрочиси У.Х.ни уриб, тан жароҳати етказган.

Мазкур ҳолат бўйича Жиноят кодексининг 219-моддаси (ҳокимият вакилига ёки фуқаровий бурчини бажараётган шахсга қаршилик кўрсатиш) 2-қисми билан жиноий иш қўзғатилиб, жиноят иши судга юборилган.

14 январь куни суд мажлисида судланувчи Ж.М. айбига иқрор бўлиб, қилмишидан қаттиқ пушаймонлигини, келгусида бундай жиноятга қўл урмаслигини, оилавий ва моддий шароити оғир эканини билдириб, ўзига нисбатан енгиллик берилишини сўраган.

Ж.М. Жиноят кодексининг 219-моддаси 1-қисмида назарда тутилган жиноятни содир этганликда айбли деб топилиб, унга нисбатан 6 ой озодликдан маҳрум қилиш жазоси тайинланган.